नाशिक | प्रतिनिधी Nashik
अशोक खरात प्रकरणात राज्यभर चर्चेत असलेल्या घडामोडींमध्ये आता राज्य महिला आयोगाच्या माजी अध्यक्षा रुपाली चाकणकर यांची एसआयटीकडून सखोल चौकशी करण्यात आली. जवळपास साडेपाच तास चाललेल्या या चौकशीनंतर चाकणकर यांनी माध्यमांशी संवाद साधत आपली पहिली प्रतिक्रिया दिली.
“एसआयटीने विचारलेल्या सर्व प्रश्नांची मी समर्पक आणि सविस्तर उत्तरं दिली आहेत. माझ्या उत्तरांमुळे चौकशी यंत्रणेचं समाधान झालं असेल, असा मला विश्वास आहे,” असे त्या म्हणाल्या., “तपासासाठी पोलिसांना जसं सहकार्य अपेक्षित असेल तसं मी पूर्ण सहकार्य करेन,” असे त्यांनी स्पष्ट केले.
चौकशीदरम्यान नेमके कोणते प्रश्न विचारण्यात आले, याबाबतही पत्रकारांनी विचारणा केली. त्यावर “अहवाल समोर आल्यानंतर सर्व माहिती स्पष्ट होईल,” असे चाकणकर यांनी सांगितले.
माहितीनुसार, दुपारी एक वाजण्याच्या सुमारास चौकशीला सुरुवात झाली होती. एसआयटी प्रमुख तेजस्वी सातपुते यांच्या नेतृत्वाखाली ही चौकशी पार पडली.
