ओझर | प्रतिनिधी Ozar
ओझर शहरातील मध्यवर्ती असलेल्या संभाजी चौक परिसरात एका तरुणाची गळा आवळून हत्या करण्यात आल्याची धक्कादायक घटना आज उघडकीस आली. भरवस्तीत घडलेल्या या घटनेने परिसरात खळबळ उडाली आहे.
मयत तरुणाचे नाव विनोद विष्णू शेंद्रे (वय ३४) असून तो मूळचा यवतमाळ जिल्ह्यातील कळंब येथील रहिवासी आहे. तो गेल्या काही महिन्यांपासून ओझर येथे एका किराणा दुकानात काम करत होता. तो कमोद फोटो स्टुडिओसमोर असलेल्या घरात एका मित्रासह भाड्याने राहत होता. आज सकाळी त्याचा मृतदेह राहत्या घरात आढळून आला.
मयताच्या मानेवर गळा आवळल्याच्या स्पष्ट खुणा दिसून आल्याने हा खूनच असल्याचे स्पष्ट झाले आहे.
घटनेची माहिती मिळताच ओझर पोलीस ठाण्याचे अधिकारी महेश कुलकर्णी यांनी पथकासह घटनास्थळी धाव घेतली. पोलिसांनी घटनास्थळाचा पंचनामा करून मृतदेह शवविच्छेदनासाठी ग्रामीण रुग्णालयात पाठविला आहे. या प्रकरणी ओझर पोलीस ठाण्यात गुन्हा दाखल दाखल झाला असून पुढील तपास सुरु आहे.
