दिल्ली । Delhi
जपानमध्ये ७.१ तीव्रतेचा अत्यंत विनाशकारी भूकंप झाला असून, या जोरदार धक्क्यानंतर लगेचच समुद्रात महाकाय त्सुनामीचा इशारा देण्यात आला आहे. भूकंपाचे तीव्र धक्के जाणवताच प्रशासनाने तातडीने आपत्कालीन यंत्रणा कार्यान्वित केली असून, किनारपट्टीच्या भागात राहणाऱ्या नागरिकांना त्वरित सुरक्षित स्थळी जाण्याचे आवाहन केले आहे.
जपान हवामान संस्थेने (JMA) दिलेल्या माहितीनुसार, स्थानिक वेळेनुसार दुपारी ४:२७ च्या सुमारास नैऋत्य जपानमधील कुमामोतो प्रांतात हा शक्तिशाली भूकंप झाला. अमेरिकन जिओलॉजिकल सर्व्हे (USGS) नुसार, या भूकंपाचा केंद्रबिंदू कुमामोतोमधील ‘उकी’ या किनारपट्टीच्या शहरात अवघ्या १० किलोमीटर खोलीवर होता. जमिनीच्या अत्यंत उथळ भागात केंद्रबिंदू असल्याने या भूकंपाची तीव्रता आणि हादरे अत्यंत तीव्र स्वरूपाचे होते. जपानच्या भूकंप तीव्रता मापनश्रेणीवर सर्वाधिक म्हणजे ७ ची कमाल तीव्रता नोंदवली गेली आहे.
भूकंपानंतर जपान सरकारने अरियाके समुद्र आणि यात्सुशिरो समुद्र किनारपट्टीसाठी १ मीटर (सुमारे ३ फूट) उंच त्सुनामीच्या लाटा उसळण्याचा कडक इशारा जारी केला आहे. खबरदारीचा उपाय म्हणून दक्षिण जपानमधील कुमामोतो, नागासाकी, कागोशिमा, फुकुओका, सागा, ओइता आणि मियाझाकी या प्रमुख प्रांतांमध्ये रेड अलर्ट जारी करण्यात आला आहे. समुद्रात तसेच नदीपात्रांजवळ राहणाऱ्या लोकांनी एका क्षणाचाही विलंब न करता उंचावरील सुरक्षित ठिकाणी स्थलांतरित व्हावे, असे प्रशासनाने स्पष्ट केले आहे.
या भीषण भूकंपानंतर संपूर्ण जपानमध्ये भीतीचे वातावरण पसरले आहे. प्राथमिक माहितीनुसार, या भागातील सेंडाई आणि गेनकाई या प्रमुख अणुऊर्जा प्रकल्पांना कोणताही धोका पोहोचलेला नाही किंवा तेथून कोणत्याही अनिष्ट घटनेची नोंद झालेली नाही, ही अत्यंत दिलासादायक बाब मानली जात आहे. तथापि, या भूकंपामुळे किती प्रमाणात वित्तहानी किंवा जीवितहानी झाली आहे, याचा नेमका अंदाज लावण्याचे काम सुरू आहे. सर्व बचाव पथके आणि आपत्कालीन यंत्रणा अलर्ट मोडवर ठेवण्यात आल्या असून किनारपट्टीच्या भागातून नागरिकांना सुरक्षित बाहेर काढण्याचे काम युद्धपातळीवर सुरू आहे.
