अहिल्यानगर |प्रतिनिधी| Ahilyanagar
अहिल्यानगर- छत्रपती संभाजीनगर महामार्गावरील पांढरीपुल घाट उतरताना वळणावरून दुचाकी घसरून पडलेल्या तरूणाला अज्ञात वाहनाने धडक दिली. या धडकेत त्यांचा मृत्यू झाला. रावसाहेब सखाराम कातोरे (वय 38 रा. सोनई ता. नेवासा) असे मयत तरूणाचे नाव आहे. रविवारी (24 नोव्हेंबर) रात्री सव्वा आठच्या सुमारास खोसपुरी (ता. नगर) गावच्या शिवारात हॉटेल लिलियम पार्क समोर ही घटना घडली.
मयत रावसाहेब कातोरे यांचे भाऊ बाळासाहेब सखाराम कातोरे (वय 40 रा. धनगरवाडी, सोनई ता. नेवासा) यांनी दिलेल्या फिर्यादीवरून अज्ञात वाहनावरील अज्ञात चालकाविरूध्द एमआयडीसी पोलीस ठाण्यात सोमवारी (25 नोव्हेंबर) सायंकाळी गुन्हा दाखल करण्यात आला आहे. रविवारी रात्री रावसाहेब कातोरे हे त्यांच्याकडील दुचाकीवरून (एमएच 20 बीए 205) अहिल्यानगर- छत्रपती संभाजीनगर महामार्गावरून प्रवास करत असताना पांढरीपुल घाट उतारावरती हॉटेल लिलियम पार्क समोर दुचाकी वळनावर घसरली.
त्यानंतर काही क्षणात पाठीमागून आलेल्या अज्ञात वाहनाची त्यांना धडक बसली. या धडकेत रावसाहेब यांच्या डोक्याला मार लागल्याने ते गंभीर जखमी होवून त्यांचा मृत्यू झाला असल्याचे फिर्यादीत नमूद केले आहे. अधिक तपास पोलीस अंमलदार दिवटे करत आहेत. दरम्यान, पांढरीपुल घाट उतरताना यापूर्वी अनेक अपघात होवून अनेकांचा जीव गेला आहे. वारंवार अपघात होत असून देखील त्या ठिकाणी उपययोजना केल्या जात नाही.
