वाहनाच्या धडकेत तरूणाचा मृत्यू

अहिल्यानगर |प्रतिनिधी| Ahilyanagar

अज्ञात वाहनाने दिलेल्या धडकेत तरुणाचा मृत्यू झाल्याची घटना अहिल्यानगर- दौंड महामार्गावर बाबुर्डी बेंद (ता. नगर) शिवारात घडली. साहेबराव वामन वाघमारे (वय 35 रा. कलगाव, ता. जि. हिंगोली) असे मयत तरुणाचे नाव आहे. याप्रकरणी नगर तालुका पोलीस ठाण्यात अज्ञात वाहनावरील चालकाविरूध्द गुन्हा दाखल करण्यात आला आहे.

मयत साहेबराव वाघमारे यांचे वडिल वामन मारूती वाघमारे (वय 60 रा. कलगाव, ता. जि. हिंगोली) यांनी फिर्याद दिली आहे. सदरची घटना 7 नोव्हेंबर रोजी रात्री 10 वाजेच्या सुमारास घडली असून गुन्हा शनिवारी (9 नोव्हेंबर) दुपारी दाखल झाला आहे. साहेबराव वामन वाघमारे हे 7 नोव्हेंबर रोजी रात्री 10 वाजता अहिल्यानगर- दौंड महामार्गावर बाबुर्डी बेंद शिवारात सुजीत सुभाष चोभे यांच्या घरासमोर असताना अज्ञात वाहन चालकाने त्याच्या ताब्यातील वाहनाची साहेबराव वाघमारे यांना धडक दिली.

या धडकेत साहेबराव जखमी होवून त्यांचा मृत्यू झाला आहे. दरम्यान, अपघातानंतर अंधाराचा फायदा घेऊन वाहन चालक पसार झाला. त्याने साहेबराव यांना कोणतीही मदत केली नसल्याचे फिर्यादीत नमूद केले आहे. वामन वाघमारे यांनी दिलेल्या फिर्यादीवरून गुन्ह्याची नोंद केली असून तपास पोलीस उपनिरीक्षक सातभाई करत आहेत.