अहिल्यानगर (प्रतिनिधी)
माध्यमिक शिक्षक सोसायटीच्या पंचवार्षिक निवडणुकीसाठी उद्या रविवार (दि. २३) मतदानाची प्रक्रिया पार पडणार आहे. संचालक मंडळाच्या २१ जागांसाठी होणाऱ्या या निवडणुकीसाठी नगरसह १४ तालुक्याच्या ठिकाणी मतदान केंद्र असून मतदानाची तयारी पूर्ण झाली असल्याची माहिती सहकार विभागाच्यावतीने देण्यात आली.
माध्यमिक शिक्षक सोसायटीच्या निवडणुकीसाठी यंदा दुरंगी लढत होत आहे. सत्ताधारी प्रा. भाऊसाहेब कचरे यांच्या पुरोगामी मंडळा विरोधात स्वाभिमानी परिवर्तन मंडळात सरळ लढत होत आहे. काही ठिकाणी अपक्ष निवडणूक रिंगणात असून सत्ताधारी पुरोगामी मंडळासमोर विरोधकांनी निर्माण केलेले आव्हान प्रभावी ठरणार का? हे निवडणुकीनंतर मतमोजणीत स्पष्ट होणार आहे. दरम्यान, माध्यमिक शिक्षक निवडणुकीसाठी तयारी पूर्ण झाली असल्याची माहिती निवडणूक निर्णय अधिकारी गणेश पुरी यांच्यावतीने देण्यात आली.
या निवडणुकीसाठी सहकार विभागाचे २५० कर्मचारी तैनात करण्यात आले असून अतिरिक्त ५० कर्मचाऱ्यांची नेमणूक करण्यात आलेली आहे. उद्या रविवारी सकाळी आठ ते दुपारी चार या वेळेत मतदान प्रक्रिया पार पडणार असून त्यानंतर लगेच सोमवारी मतमोजणी होणार असल्याचे सांगण्यात आले. या निवडणुकीसाठी नगर शहरात अहमदनगर एज्युकेशन सोसायटीच्या भाऊसाहेब फिरोदिया हायस्कूल माळीवाडा या ठिकाणी सहा मतदान केंद्र आहे. याठिकाणी नगर-पारनेर आणि नगर श्रीगोंदा येथील मतदार मतदानाचा हक बजावणार आहेत.
जामखेड तालुक्यातील मतदार ल. ना. होशिंग विद्यालय जामखेड या ठिकाणी मतदान करणार आहेत. यासह पारनेर शहरात दोन केंद्र असून हे केंद्र न्यू इंग्लिश स्कूल व ज्युनियर कॉलेज या ठिकाणी मतदान होणार आहे. श्रीगोंदा तालुक्यातील मतदारांसाठी श्रीगोंदा माध्यमिक विद्यालय, कर्जत शहरातील समर्थ माध्यमिक विद्यालय, पाथर्डीतील संत ज्ञानेश्वर माध्यमिक विद्यालय, शेवगावमध्ये आबासाहेब काकडे माध्यमिक विद्यालय, नेवाशात ज्ञानेश्वर महाविद्यालय, श्रीरामपूरमध्ये श्रीरामपूर एज्युकेशन सोसायटी हायस्कूल, राहुरी विद्यामंदिर प्रशाला, कोपरगावमध्ये सोमय्या कॉलेज, मोहनीराजनगर, संगमनेरमध्ये मेहेर प्राथमिक विद्यामंदिर, अकोल्यात अगस्ती माध्यमिक विद्यालय आणि राहात्यात पीजीएस शाळा राहाता या ठिकाणी मतदान केंद्र राहणार आहेत. निवडणुकीसाठी सहकार विभागाच्यावतीने एस. व्ही. बनसोडे, अल्ताफ शेख, संतोष वासकर, सयाजी होळकर, महेंद्र घोडके हे निवडणूक निर्णय अधिकारी पुरी यांना सहाय्य
करणार आहेत.
२१ जागांसाठी ४४ उमेदवार
संचालक मंडळाच्या २१ जागांपैकी सर्वसाधारण प्रवर्गाच्या १६ जागांसाठी ३३ उमेदवार, अनुसूचित मतदारसंघाच्या एका जागेसाठी तिघे, महिलांच्या दोन जागांसाठी चार, ओबीसीच्या एका जागेसाठी दोन आणि भटक्या विमुक्तांच्या एका जागेसाठी दोन असे ४४ उमेदवार निवडणूक रिंगणात आहेत. माध्यमिक सोसायटीसाठी ९ हजार १५२ मतदार आहेत. मागील निवडणुकीत सोसायटीवर कचरे यांच्या पुरोगामी मंडळाने वर्चस्व ठेवले होते. विरोधी गटाचे काही संचालक निवडून आले होते. मात्र, त्यानंतरही सोसायटीत कचरे यांनी एकहाती कारभार केला होता. यंदा माध्यमिक शिक्षक कोणाच्या हाती सोसायटीच्या चाव्या देणार हे मतमोजणीनंतर स्पष्ट होणार आहे.
