देवगड फाटा (वार्ताहर)
श्रीक्षेत्र देवगड संस्थानचे प्रमुख आणि वारकरी संप्रदायातील ज्येष्ठ मार्गदर्शक ह.भ.प. भास्करगिरीजी महाराज यांच्या मातोश्री सरुबाई ज्ञानदेव पेसोडे यांचे आज रविवारी पहाटे निधन झाले. वयाच्या ९९ व्या वर्षी त्यांनी अखेरचा श्वास घेतला. त्यांच्या निधनामुळे देवगड परिसरासह संपूर्ण भक्त परिवारावर शोककळा पसरली आहे.
मिळालेल्या माहितीनुसार, सरुबाई पेसोडे गेल्या काही काळापासून अल्पशा आजाराने त्रस्त होत्या. आज सकाळी ६ वाजून १४ मिनिटांच्या सुमारास त्यांची प्राणज्योत मालवली. भास्करगिरी महाराजांसारख्या थोर महंतांच्या जडणघडणीत त्यांच्या मातोश्रींचा मोठा वाटा असल्याचे मानले जाते. सरुबाई यांच्या पश्चात दोन मुले आणि एक मुलगी असा मोठा परिवार आहे. त्यांच्या मुलांमध्ये देवगड संस्थानचे महंत भास्करगिरी महाराज आणि मधुकर ज्ञानदेव पेसोडे यांचा समावेश आहे, तर कमलबाई पांडुरंग रायपुरे या त्यांच्या कन्या आहेत. एका आदर्श मातेच्या निधनाने पेसोडे कुटुंबावर दुःखाचा डोंगर कोसळला आहे.
सरुबाई पेसोडे यांच्या निधनाची बातमी समजताच देवगड संस्थानच्या भक्त परिवारासह राजकीय, सामाजिक आणि धार्मिक क्षेत्रातील मान्यवरांनी शोक व्यक्त केला आहे. देवगड परिसरातील नागरिकांनीही महाराजांच्या निवासस्थानी धाव घेत त्यांचे सांत्वन केले. वारकरी संप्रदायातील अनेक कीर्तनकार आणि भाविकांनी सोशल मीडियाच्या माध्यमातून सरुबाईंना श्रद्धांजली वाहिली आहे.
कुटुंबियांनी दिलेल्या माहितीनुसार, सरुबाई पेसोडे यांचा अंत्यविधी आज रविवारी सायंकाळी ४ वाजून ३० मिनिटांनी श्रीक्षेत्र देवगड संस्थानच्या परिसरातच पार पडणार आहे. या अंत्यसंस्काराला मोठ्या संख्येने भाविक आणि भक्त उपस्थित राहण्याची शक्यता असल्याने प्रशासनाकडून योग्य ती काळजी घेतली जात आहे. भास्करगिरी महाराजांच्या मातोश्रींच्या जाण्याने एका आध्यात्मिक पर्वाचा साक्षीदार हरपल्याची भावना व्यक्त होत आहे.
