देवळा | प्रतिनिधी Deola
तालुक्यातील वाखारवाडी ता.देवळा येथील अक्षय हिरामण निकम (वय -१९) हा युवक आज सायंकाळी पाच वाजता मोटारसाकयलने चांदवड येथून येत असताना चिंचबारी घाटाच्या पायथ्याशी बिबट्याने अचानक हल्ला केला. यामुळे तो मोटारसायकलवरून खाली पडला. बिबट्याचा प्रतिकार करत असतानाच त्याने जोरजोरात आरडाओरडा केल्याने तेथील येणाऱ्याजाणाऱ्यानी धाव घेतल्याने बिबट्याने काढता पाय घेतला.
यात अक्षयच्या शरीरावर बिबट्याच्या नखांमुळे जखमा झाल्या असून उपचारासाठी देवळा ग्रामीण रुग्णालयात दाखल करण्यात आले. तेथे यावरील लस उपलब्ध नसल्याने तातडीने मालेगाव येथे पाठविण्यात आले. वाखारीच्या कापराई व चिंचबारी शिवारात बिबट्यांचा वावर वाढल्याने आणि शेतकऱ्यांवर त्यांचे हल्ले होऊ लागल्याने भीतीचे वातावरण आहे.
या पार्श्वभूमीवर पिंजरे बसविण्याची मागणी होत असून देवळा वनपरिक्षेत्र आधिकारी संतोष जाधव ,वनपाल प्रसाद निकम ,वनरक्षक विजय पगार यांनी स्थळ पाहणी करून रुग्णालयात जखमी युवकास भेट दिली. दरम्यान ,पिंजरा लाऊन बिबट्याचा बंदोबस्त करावा अशी मागणी वनविभागाकडे करण्यात आली आहे.
