मुंबई | प्रतिनिधी Mumbai
विधान परिषदेच्या स्थानिक प्राधिकारी मतदारसंघाच्या निवडणुकीसाठी भाजपने रविवारी रात्री उशीरा ११ उमेदवारांची यादी जाहीर केली. अपेक्षेनुसार भाजपने अहिल्यानगर मतदारसंघातून माजी राज्यमंत्री प्राजक्त तनपुरे यांना उमेदवारी दिली आहे. तर जळगावमधून नंदकिशोर महाजन यांना तिकीट देण्यात आले आहे.
काँग्रेसमधून भाजपमध्ये प्रवेश केलेल्या अमर राजूरकर यांना नांदेडमधून तर धाराशिव – लातूर – बीडमधून माजी राज्यमंत्री बसवराज पाटील यांना उमेदवारी दिली आहे. सोलापूरमधून माजी आमदार राजेंद्र राऊत यांना रिंगणात उतरविण्यात आले आहे. तर नागपूर पोटनिवडणुकीत डॉ. राजीव पोतदार यांना उमेदवारी मिळाली आहे.
भाजपने वर्धा – चंद्रपूर – गडचिरोलीतून अरुण लखाणी, भंडारा – गोंदियातून अविनाश ब्राह्मणकर, अमरावतीमधून माजी राज्यमंत्री प्रवीण पोटे – पाटील, सांगली – सातारामधून धैर्यशील कदम तर छत्रपती संभाजीनगर – जालनामधून सुहास शिरसाट यांना भाजपने उमेदवारी दिली आहे.
