चांदोरी | वार्ताहर Chandori
खेरवाडी येथील भाऊसाहेब देवचंद आवारे यांच्या विहिरीमध्ये एका अज्ञात व्यक्तीचा मृतदेह आढळून आल्याची घटना उघडकीस आली आहे. सदर मृतदेह विहिरीत असल्याची माहिती मिळताच सायखेडा पोलीस अधिकारी यांनी तात्काळ आपत्ती व्यवस्थापन पथक चांदोरी यांना घटनास्थळी पाचारण केले.
आपत्ती व्यवस्थापन पथकाच्या मदतीने विहिरीतून मृतदेह बाहेर काढण्यात आला. प्राथमिक अंदाजानुसार हा मृतदेह साधारणतः सहा ते सात दिवसांपूर्वीचा असून मृत व्यक्ती पुरुष असल्याचे समोर आले आहे.
या शोध आणि बचाव कार्यामध्ये आपत्ती व्यवस्थापन पथक प्रमुख सागर गडाख, संतोष लगड, वैभव जमदाडे तसेच ग्रामस्थ उपस्थित होते. यावेळी सायखेडा पोलीस स्टेशनचे पोलीस निरीक्षक घुगे साहेब, मोठा भाऊ जाधव, लगड दादा पोलीस पाटील व इतर अधिकारी घटनास्थळी उपस्थित होते.
सदर घटनेबाबत पुढील तपास सायखेडा पोलीस स्टेशनचे कर्मचारी व अधिकारी करत असून मृत व्यक्तीची ओळख पटविण्याचे काम सुरू आहे.
