अहमदनगर |प्रतिनिधी| Ahmednagar
बंद घराचे कुलूप तोडून चोरट्यांनी घरात उचकापाचक करून सोन्यांचे दागिने व रोख रक्कम असा 87 हजारांचा ऐवज चोरून नेला. ही घटना शुक्रवारी (दि.30) रोजी सकाळी 9 ते सायंकाळी 6 वाजता घडली. याप्रकरणी राजेश वंजारे (वय 36, रा. तारकपूर) यांनी पोलिसांत फिर्याद दिली आहे. 30 रोजी सकाळी 9 वाजता फिर्यादी हे नेहमीप्रमाणे घराला कुलूप लावून कामाला गेले होते. त्यांची आई भिंगार येथे धार्मिक कार्यक्रमासाठी गेली होती. फिर्यादी सायंकाळी घरी आले असता, त्यांना घराच्या किचनची खिडकी उघडी दिसली.
मागील स्टोरूमकडून घरामध्ये आत जाण्यासाठी ते गेले असता त्यांना मागील दरवाजाचे उघडले दिसले. त्यानंतर घरात पाहिले असता घरात उचकापाचक केलेली दिसली. लोखंडी कपाटात सोन्यांचे दागिने व रोख रक्कम ठेवलेला डब्बा दिसून आला नाही. त्यामुळे घरात चोरी झाल्याचे फिर्यादी यांच्या लक्षात आले. 5 हजारांची रोख रक्कम, 15 हजार रूपये किंमतीची एक तोळ्याची सोन्यांची पोत, 15 हजाराची एक तोळ्याची सोन्यांची अंगठी, 15 हजाराचे एक तोळ्याचे सोन्यांचे मंगळसूत्र, 15 हजाराचे सोन्यांचे कानातले, 7 हजाराची अर्धा तोळ्याची डोरमाळ, 7 हजाराचे अर्धा तोळ्याचे डोरले, 7 हजाराचे अर्धा तोळ्याची नथ, 1 हजाराचे चांदीचे कडे असा एकूण 87 हजाराचा ऐवज चोरट्यांनी चोरून नेल्याचे त्यांनी फिर्यादीत म्हटले आहे.
