मुंबई | प्रतिनिधी Mumbai
बारामती आणि राहुरी विधानसभा मतदारसंघाच्या पोटनिवडणुकीतील प्रचाराची आज सांगता झाली. मुख्यमंत्री देवेंद्र फडणवीस यांनी आज बारामतीत महायुतीच्या उमेदवार सुनेत्रा पवार यांच्यासाठी प्रचारसभा घेतली. तर फडणवीस यांनी सोमवारी राहुरीत भाजप उमेदवाराच्या प्रचारसभेत भाग घेतला होता.
उपमुख्यमंत्री अजित पवार आणि भाजपचे आमदार शिवाजीराव कर्डिले यांच्या निधनामुळे रिक्त झालेल्या अनुक्रमे बारामती, राहुरी विधानसभा मतदारसंघाच्या पोटनिवडणुकीसाठी , गुरुवारी, २३ एप्रिल २०२६ रोजी मतदान होत आहे. बारामतीमध्ये सुनेत्रा पवार यांच्यासह २३ तर राहुरीत ७ उमेदवार निवडणूक रिंगणात आहेत.
बारामतीत महाविकास आघाडीने सुनेत्रा पवार यांना पाठींबा दिला आहे. मात्र, राहुरीत भाजपचे अक्षय कर्डिले आणि राष्ट्रवादी शरद पवार गटाचे गोविंद मोकाटे यांच्यात मुख्य लढत होत आहे. येथे वंचित बहुजन आघाडीनेही उमेदवार उभा केला आहे.
