बंगळुरू। Bengaluru
बंगळुरूमध्ये एक मोठी दुर्घटना घडल्याचे समोर आले आहे. बंगळुरू पूर्व येथे हन्नूर येथे एक बांधकाम सुरू असलेली इमारत कोसळली आहे. या इमारतीच्या ढिगाऱ्याखाली अनेकजण अडकल्याची शक्यता वर्तविली जात आहे. दरम्यान या घटनेचा सीसीटीव्ही व्हिडीओ व्हायरल झाला आहे.
बंगळुरूमध्ये मुसळधार पावसाने कहर केला आहे. पावसामुळे बांधकाम सुरू असलेली इमारत कोसळली आहे. अग्निशमन आणि आपत्कालीन विभागाच्या दोन रेस्क्यू व्हॅन बचाव कार्यासाठी तैनात करण्यात आल्या आहेत. या घटनेची माहिती अधिकाऱ्यांनी दिली आहे.
मिळालेल्या माहितीनुसार इमारतीत १७ लोक अडकल्याची भीती व्यक्त केली जात आहे आणि एजन्सींच्या मदतीने समन्वित प्रयत्नात बचाव कार्य केले जात आहे. गेल्या तीन दिवसांपासून बंगळुरूमध्ये सतत पाऊस पडत आहे. यामुळे अनेक भागात पुरस्थिती निर्माण झाली आहे.
