अहिल्यानगर |प्रतिनिधी| Ahilyanagar
राज्यातील भोगवटादार वर्ग 2 च्या जमिनी असणार्‍या शेतकर्‍यांना आता बँकांकडून कर्ज मिळवण्यात येणार्‍या अडचणी दूर होणार आहेत. महसूल विभागाने यासंदर्भात मोठा निर्णय घेतला असून राज्यभरातील भोगवटादार वर्ग 2 च्या जमिनी असणार्‍या शेतकर्‍यांना या जमिनींवर तारण कर्ज मिळणार आहे. याबाबतचे परिपत्रक महसूल विभागाने जारी केले असून अहिल्यानगरसह राज्यातील लाखो शेतकर्‍यांना दिलासा मिळणार आहे.
हा निर्णय कोणत्याही एका बँकेपुरता मर्यादित नसून राज्यातील कोणत्याही बँकेतून कर्ज मिळणं सोपं होणार आहे. यापूर्वी 1990 मध्ये भोगवटादार वर्ग दोनच्या जमिनींबाबत परिपत्रक काढण्यात आले होते. बँकेसह राष्ट्रीयीकृत बँकांनाही पीककर्ज, शेती विकासासाठी मध्यम, दीर्घ मुदतीचे कर्ज देता येणार आहे. कर्जासाठी शासन किंवा जिल्हाधिकार्‍यांच्या परवानगीची गरज नाही. शेतकर्‍यांच्या हितासाठी जिल्हा बँका शेतकर्‍यांना कर्जपुरवठा करतात. मात्र, एखादा शेतकरी कर्ज परतफेड करू शकला नाही. तर बँक अडचणीत येते. अशावेळी बँकेने त्याच्याकडून तारण घेतलेली जमीन भोगावटादार वर्ग 2 असेल तरी त्यावर बोजा चढविता येत नाही असे बँकांचे म्हणणे होते. त्यामुळे भोगवटादार वर्ग 2 च्या जमिनी बँकेकडून तारण ठेवल्या जात नव्हत्या. तसेच शेतकर्‍यांना कर्जही मिळत नव्हते. आता जिल्हा बँकांबरोबरच राष्ट्रीयीकृत बँकांनाही या जमिनी तारण म्हणून घेता येणार आहेत. याबाबतचे स्मरणपत्र राज्यातील सर्व विभागीय आयुक्त आणि जिल्हाधिकारी यांना पाठविण्यात आले आहे.
या निर्णयामुळे राज्यातील भोगवटादार वर्ग 2 म्हणून जमीन धारण करणार्‍या शेतकर्‍यांना बँकांकडून कर्ज मिळविण्यात येणार्‍या अडचणी दूर होणार आहेत. आता भोगवटादार वर्ग दोनच्या जमिनीवर तारणकर्ज देता येणार आहे. याबाबतचे परिपत्रक महसूल विभागाने जारी केले. सातारा येथील जिल्हा मध्यवर्ती बँकेच्या अधिकार्‍यांनी 11 मार्च रोजी भोगवटादार वर्ग 2 च्या जमिनीबाबत बैठक घेऊन हा प्रश्न महसूल विभागाच्या निदर्शनास आणून दिला होता. त्यानंतर महसूलमंत्री चंद्रशेखर बावनकुळे यांनी हा निर्णय घेतलाय. हा निर्णय केवळ एका बँकेपुरता मर्यादित न ठेवता राज्यातील सर्वच भोगवटादार वर्ग 2 खातेधारकांची अडचण लक्षात घेऊन त्यांना भोगावटादार वर्ग 2 च्या जमीनी बँकेला तारण घेता येणार आहे.
भोगवटा वर्ग दोनच्या जमिनी म्हणजे काय ?
ज्या जमिनी खातेदाराला विकण्याचा अधिकार असा खातेदार म्हणजेच भोगवटादार वर्ग 2 . भोगवटा वर्ग दोन च्या जमिनींमध्ये. देवस्थानासाठी दिलेल्या इमानी जमीनी, हैद्राबाद अतियात जमिनी, वतन जमीन, वन जमीन, गायरान, पुन पुनर्वसनाच्या जमीनी व शासनाने दिलेल्या जमिनींचा समावेश होतो. अशा जमीनी विक्री साठी शासनाची पूर्व परवानगी घेणे आवश्यक असते.
