अहिल्यानगर |प्रतिनिधी| Ahilyanagar
महापालिकेच्या विद्युत विभागातील कंत्राटी कर्मचारी धीरज कचरूसिंग राजपूत-परदेशी यांच्या निर्घृण हत्येप्रकरणी दाखल गुन्ह्यात आणखी एकाचा सहभाग पोलिसांच्या तपासात समोर आला आहे. मुख्य संशयित आरोपींना मदत केल्याच्या आरोपावरून इम्रान मुसा सय्यद (रा. सिव्हील कॉलनी, मुकुंदनगर) याला भिंगार कॅम्प पोलिसांनी गुरूवारी (13 ऑगस्ट) अटक केली. न्यायालयाने त्याला 17 ऑगस्टपर्यंत चार दिवसांची पोलीस कोठडी सुनावली आहे.
धीरज राजपूत-परदेशी हे मुकुंदनगर परिसरातील दर्गा दायरा येथे पथदिव्यांच्या दुरूस्तीचे काम करीत असताना त्यांच्यावर हल्ला करण्यात आला होता. या हल्ल्यात ते गंभीर जखमी झाले होते. त्यांच्यावर उपचार सुरू असतानाच 9 ऑगस्ट रोजी त्यांचा मृत्यू झाला. या घटनेनंतर शहरात संतप्त प्रतिक्रिया उमटल्या होत्या. भिंगार कॅम्प पोलीस ठाण्यात या प्रकरणी खुनाचा गुन्हा दाखल करण्यात आला असून, पोलिसांनी तपासाची चक्रे वेगाने फिरवली आहेत. या प्रकरणातील मुख्य संशयित मुस्तकीम ख्वाजामिया सय्यद, मेहराज इब्राहिम सय्यद आणि सिराज इब्राहिम सय्यद (तिघेही रा. आलमगीर, भिंगार) यांना पोलिसांनी हैदराबाद येथून ताब्यात घेतले होते. त्यांना पळून जाण्यास मदत केल्याच्या आरोपावरून ख्वाजामिया उर्फ अकरम याकुब सय्यद (रा. आलमगीर) आणि वसीम रहिम सय्यद (रा. फकीरवाडा, मुकुंदनगर) यांनाही नगरमधून अटक करण्यात आली. याशिवाय महापालिकेचा वायरमन युनूस खान यालाही पोलिसांनी अटक केली आहे. या सर्वांकडे सध्या पोलिसांकडून कसून चौकशी सुरू आहे.
तपासादरम्यान मुख्य संशयित तिघांना इम्रान सय्यद याने मदत केल्याचे पोलिसांच्या निदर्शनास आले. त्यानंतर त्याला अटक करण्यात आली. मुख्य संशयितांना त्याने नेमकी कोणत्या स्वरूपाची मदत केली, हत्येच्या घटनेशी त्याचा प्रत्यक्ष किंवा अप्रत्यक्ष संबंध आहे का, तसेच घटनेनंतर आरोपींना लपण्यासाठी अथवा पळून जाण्यासाठी त्याने कोणती मदत केली, याचा तपास पोलीस कोठडीत केला जाणार आहे. दरम्यान, या गुन्ह्यात आणखी कोणाचा सहभाग आहे का, याचाही पोलिसांकडून शोध सुरू आहे. त्यामुळे तपासात आणखी काही नावे समोर येण्याची शक्यता व्यक्त केली जात आहे.
पोलीस कर्मचार्‍यांचीही चौकशी
दरम्यान, धीरज परदेशी हत्या प्रकरणात दोन पोलीस कर्मचार्‍यांचा सहभाग असल्याचा आरोप आमदार संग्राम जगताप यांनी डीएसपी चौकातील आंदोलनादरम्यान केला होता. या आरोपांची चौकशी करून दोषी आढळल्यास योग्य ती कारवाई केली जाईल, असे आश्वासन अपर पोलीस अधीक्षक वैभव कलुबर्मे यांनी दिले होते. या पार्श्वभूमीवर शहर विभागाचे पोलीस उपअधीक्षक डॉ. दिलीप टिपरसे यांच्या मार्गदर्शनाखाली संबंधित दोन पोलीस कर्मचार्‍यांची चौकशी सुरू करण्यात आली आहे. हत्या प्रकरणातील आरोपींना मदत करण्यात त्यांची कोणती भूमिका होती का, तसेच त्यांच्या भूमिकेबाबत करण्यात आलेल्या आरोपांमध्ये तथ्य आहे का, याची तपासणी पोलिसांकडून केली जात आहे.
