अहिल्यानगर |प्रतिनिधी| Ahilyanagar
शासनाचा कोणताही परवाना नसताना घरगुती गॅस टाक्या जवळ बाळगून लोकांच्या जिवास धोका निर्माण होण्याची शक्यता असताना गॅस टाकीतून गॅस काढून अन्य वाहनात भरणार्‍या दोन रिफिलिंग सेंटरवर नगर शहर पोलीस उपअधीक्षक अमोल भारती यांच्या पथकाने छापा टाकला. या कारवाईत गॅस टाक्या, व्हॅन, दोन रिक्षा, रिफिलिंग मशीन असा 3 लाख 62 हजार 800 रुपये किमतीचा मुद्देमाल जप्त करून पाच जणांना ताब्यात घेतले.
ही कारवाई स्टेशन रोडवरील खालकर हॉस्पिटल समोर पत्र्याच्या शेडमध्ये आणि स्टेशन रोडवरील लोखंडी पुलाजवळील रिफिलिंग सेंटरवर शुक्रवारी (20 डिसेंबर) दुपारी केली. खालकर हॉस्पीटल समोर, नगर पुणे रोडचे डावे बाजुला पत्राचे शेडमध्ये विनोद पोळ अनधिकृतरित्या गॅस रिफलींग करीत आहे. अशी माहिती मिळाल्याने उपअधीक्षक भारती यांनी पोलिस पथकास कारवाई करण्याचे आदेश दिले. पथकाने सदर ठिकाणी छापा टाकला असता गॅस रिफिंलिग सुरू असल्याचे दिसून आले. विनोद मनोज पोळ (वय 24 रा. पाटील हॉस्पिटल शेजारी, कोठी, अ.नगर) याच्यासह राजेंद्र भिमराज बडे (वय 39 रा.बारदरी ता.नगर जि.अ.नगर) व बबन नाथू कातोरे (वय 60 रा. अंबिका विद्यालय शेजारी, केडगाव, अ.नगर) यांच्या विरोधात गुन्हा दाखल करण्यात आला आहे.
दुसरी कारवाई स्टेशन रोडवरील जुन्या लोखंडी पुलावरुन मल्हार चौकाकडे जाताना शुभम मेन्स पार्लरचे पाठीमागील पत्राच्या शेडमध्ये करण्यात आली. विठ्ठल राजु पारधे (वय 19 रा.मल्हार चौक, अ.नगर), अनिल मुकुंद भिंगारदिवे (वय-55 रा. माळीवाडा, झेड पी समोर, अ.नगर) यांना ताब्यात घेऊन त्यांच्या विरोधात गुन्हा दाखल केला आहे. उपअधीक्षक भारती यांच्या पथकातील पोलीस उपनिरीक्षक गजेंद्र इंगळे, पोलीस अंमलदार राजीव जाधव, महेश मगर, संतोष ओव्हाळ यांच्या पथकाने ही कारवाई केली.
