अहिल्यानगर |प्रतिनिधी|Ahilyanagar
सराईत गुन्हेगाराच्या ताब्यातून एमआयडीसी पोलिसांनी एक गावठी कट्टा व एक जिवंत काडतुस जप्त केले आहे. नीलेश बाबासाहेब ससाणे (वय 23 रा. सिध्दार्थनगर, अहिल्यानगर) असे त्याचे नाव आहे. त्याच्याविरूध्द पोलीस ठाण्यात गुन्हा दाखल करण्यात आला असून त्याला अटक करण्यात आली आहे.
रविवारी (17 नोव्हेंबर) दुपारी नगर तालुक्यातील धनगरवाडी शिवारात पोलिसांनी ही कारवाई केली. धनगरवाडी शिवारात हनुमान मंदीर परिसरात एक इसम बेकायदेशीरपणे एक गावठी कट्टा, काडतुस बाळगून असल्याची माहिती सहायक पोलीस निरीक्षक माणिक चौधरी यांना रविवारी दुपारी मिळाली होती. त्यांनी एक पथक तयार करून सदर कारवाईकामी रवाना केले. या पथकाने धनगरवाडी शिवारात सापळा लावून संशयित इसम नीलेश बाबासाहेब ससाणे याला पकडले. त्याच्या ताब्यातून एक गावठी कट्टा व एक जिवंत काडतुस असा 25 हजार 500 रुपयांचा मुद्देमाल जप्त करण्यात आला आहे.
त्याच्याविरूध्द तोफखाना व एमआयडीसी पोलीस ठाण्यात गंभीर मारहाण, आर्म अ‍ॅक्ट कलमानुसार दोन गुन्हे यापूर्वी दाखल आहेत. सहायक निरीक्षक चौधरी यांच्या मार्गदर्शनाखाली पोलीस उपनिरीक्षक विकास जाधव व देविदास भालेराव, अंमलदार राजु सुद्रिक, किशोर जाधव, भगवान वंजारी, सुरेश सानप यांच्या पथकाने ही कारवाई केली.
