अहिल्यानगर |प्रतिनिधी| Ahilyanagar
जानेवारी 2024 ते डिसेंबर 2025 या कालावधीत मुदत संपणार्‍या, नवनिर्मित, मागील निवडणुकांमध्ये चुकीची प्रभाग रचना झाल्यामुळे, तसेच बहिष्कार व इतर कारणांमुळे निवडणुका न होऊ शकलेल्या नगर जिल्ह्यातील 99 जिल्ह्यातील ग्रामपंचायतींचा मतदार यादी कार्यक्रम 12 मार्चला राज्य निवडणूक आयोगाने जाहीर केला होता. या कार्यक्रमानुसार कार्यवाही करण्यात येवूून आज बुधवार (दि.26) रोजी या जिल्ह्यातील 99 ग्रामपंचायतीच्या निवडणुकीची पूर्व तयारी म्हणून याठिकाणी प्रभागनिहाय अंतिम मतदार यादी प्रसिध्द करण्यात येणार आहे. यामुळे याठिकाणी लवकरच निवडणूक कार्यक्रम जाहीर होणार असल्याची शक्यता आहे.
राज्य निवडणूक आयोगाने 12 मार्चला नगरसह राज्यातील 1 हजार 673 ग्रामपंचायतींच्या सार्वत्रिक तसेच सदस्य अथवा सरपंचाच्या रिक्त जागांवर पोटनिवडणूक घेण्यासाठी पारंपरिक पद्धतीने राबविण्यात येणार्‍या मतदार यादी कार्यक्रम जाहीर केला होता. यात नगर जिल्ह्यातील 99 ग्रामपंचायतीचा तर 197 ठिकाणी होणार्‍या पोटनिवडणुकीसाठी मतदार यादी अद्यावत करण्यात आल्या आहेत. राज्य निवडणूक आयोगाच्या आदेशानूसार जिल्ह्यात 19 मार्चला प्रभागनिहाय प्रारूप मतदार प्रसिध्द करण्यात आली. त्यानंतर या यादीवर 24 मार्चपर्यंत हरकती व सूचना घेण्यात आल्या असून आज प्रभागनिहाय अंतिम मतदार यादी प्रसिद्ध करण्यात येणार आहे. जिल्ह्यात जानेवारी 24 पासून आतापर्यंत 99 ग्रामपंचायतीच्या निवडणुका होणे बाकी आहे. या ग्रामपंचायतीच्या प्रभाग रचना अंतिम करण्यात आलेल्या असून या ठिकाणी वर्षभरापासून निवडणुकीची प्रतीक्षा आहे.
गेले तीन वर्षापासून राज्यातील जिल्हा परिषद पंचायत समित्या आणि महानगरपालिका यांच्या निवडणुका रखडलेले आहेत. याबाबत सर्वोच्च न्यायालयात सुनावणी सुरू असून अद्याप अंतिम निर्णय झालेला नाही. मात्र, निवडणुका न झालेल्या ग्रामपंचायतीसाठी राज्य निवडणूक आयोग टप्प्याटप्प्याने हालचाली करताना दिसत आहे. त्याचाच भाग म्हणून ग्रामपंचायतीचा मतदार यादी कार्यक्रम पूर्ण करण्यात येत आहे. गेल्या वर्षी 2024 मध्ये मुदत संपलेल्या ग्रामपंचायतींमध्ये अकोले 8 (69 सदस्य), संगमनेर 2 (14 सदस्य), कोपरगाव 3 (7 सदस्य), राहाता 1 (3 सदस्य), श्रीरामपूर 2 (7 सदस्य), राहुरी 3 (6 सदस्य), नेवासा 26 (10 सदस्य), शेवगाव 6 (19 सदस्य), पाथर्डी 4 (6 सदस्य), जामखेड 3 (सदस्य 5) श्रीगोंदा 1 (4 सदस्य), कर्जत 8 (3 सदस्य), पारनेर 1 (6 सदस्य) आणि नगर 7 (6 सदस्य) अशा 84 ग्रामपंचायत आणि 155 सदस्य यांचा समावेश आहे.
तर 2025 मध्ये मुदत संपलेल्या ग्रामपंचायतीमध्ये श्रीगोंदा तालुक्यातील 6, संगमनेर 2, कर्जत 2, पारनेर 2 आणि अकोले तालुक्यातील 3 ग्रामपंचायतींचा समावेश आहे. निवडणूक न झालेल्या 99 ग्रामपंचायतीसाठी आज अंतिम मतदार यादी प्रसिध्द झाल्यानंतर लवकरच निवडणुकीची घोषणा होवू शकते, असा अंदाज जिल्हा निवडणूक विभागाच्यावतीने वर्तवण्यात आला आहे.
