अहिल्यानगर |प्रतिनिधी| Ahilyanagar
पानमसाला आणि सुगंधित तंबाखूची दुचाकीवरून चोरटी वाहतूक करणार्या एका तरूणाला तोफखाना पोलिसांनी ताब्यात घेतले आहे. शेरअली आरीफ तांबोळी (वय 25, रा. व्यापारी मोहल्ला, नालबंद खुंट, अहिल्यानगर) असे त्याचे नाव आहे. त्याच्याविरूध्द पोलीस ठाण्यात गुन्हा नोंद करण्यात आला आहे.
बुधवारी (25 मार्च) दुपारी तीन वाजता सिध्दीबाग परिसरात करण्यात आलेल्या या कारवाईत पोलिसांनी 42 हजार 292 रूपये किमतीचा मुद्देमाल हस्तगत केला आहे. सिध्दीबागेकडून जगुभाई तालीम कडे जाणार्या रस्त्यावर संशयित इसम शेरअली आरीफ तांबोळी हा दुचाकीवरून जात होता.
तोफखाना पोलिसांच्या पथकाने त्याला थांबवून झडती घेतली असता, त्याच्याकडे विमल, हिरा, डायरेक्टर असा विविध कंपन्यांचा गुटखा आणि तंबाखूचे पाकीट मिळून आले. स्वतःच्या आर्थिक फायद्यासाठी मानवी शरीरास अपायकारक असलेला हा साठा तो विक्रीसाठी घेऊन जात असल्याचे निष्पन्न झाले आहे. पोलिसांनी गुटख्यासह दुचाकी जप्त केली आहे. पोलीस निरीक्षक जगदीश भांबळ यांच्या मार्गदर्शनाखाली पथकाने ही कारवाई केली.
