दिल्ली । Delhi
दिल्लीहून पश्चिम बंगालमधील बागडोगरा येथे जाणाऱ्या इंडिगोच्या विमानात बॉम्ब असल्याची धमकी मिळाल्याने मोठी खळबळ उडाली. या धमकीच्या पत्रामुळे सुरक्षेचा प्रश्न निर्माण झाल्याने वैमानिकांनी तातडीने लखनौच्या चौधरी चरण सिंग आंतरराष्ट्रीय विमानतळावर विमानाचे आपत्कालीन लँडिंग (Emergency Landing) केले. सुदैवाने, या घटनेत सर्व २३० प्रवासी आणि ७ क्रू मेंबर्स सुरक्षित आहेत.
मिळालेल्या माहितीनुसार, इंडिगोचे फ्लाईट ६ई-६६५० (6E-6650) सकाळी ७:४६ वाजता दिल्लीहून बागडोगरासाठी रवाना झाले होते. विमान हवेत असतानाच एका प्रवाशाला विमानातील वॉशरुममध्ये एक टिशू पेपर सापडला. या टिशू पेपरवर हाताने ‘विमानात बॉम्ब आहे’ (Plane mein bomb) असा संदेश लिहिलेला होता. प्रवाशाने ही बाब तातडीने क्रू मेंबर्सच्या लक्षात आणून दिली, ज्यामुळे विमानात चिंतेचे वातावरण निर्माण झाले.
विमानातील कर्मचाऱ्यांनी ही गोपनीय माहिती वैमानिकांना दिली, ज्यांनी त्वरित एअर ट्रॅफिक कंट्रोलशी (ATC) संपर्क साधला. सकाळी ८:४६ च्या सुमारास एटीसीला या धमकीची माहिती मिळाली. परिस्थितीचे गांभीर्य ओळखून विमान जवळच्या लखनौ विमानतळाकडे वळवण्याचा निर्णय घेण्यात आला. लखनौ विमानतळावर सकाळी ९:१७ वाजता विमानाचे सुरक्षित लँडिंग करण्यात आले.
लँडिंगनंतर विमान धावपट्टीपासून दूर एका सुरक्षित ‘आयसोलेशन बे’मध्ये (Isolation Bay) पार्क करण्यात आले. तिथे आधीच सज्ज असलेल्या केंद्रीय औद्योगिक सुरक्षा दल (CISF), बॉम्ब निकामी पथक (BDS) आणि स्थानिक पोलिसांनी विमानाचा ताबा घेतला. विमानातील २३० प्रवासी (ज्यामध्ये ८ लहान मुलांचा समावेश होता), २ पायलट आणि ५ क्रू मेंबर्सना तातडीने सुरक्षित बाहेर काढण्यात आले.
अग्निशमन दलाचे अधिकारी रजनीश वर्मा आणि सुरक्षा यंत्रणांनी विमानाची आणि प्रवाशांच्या सामानाची कसून तपासणी केली. तपासणी दरम्यान विमानाचा प्रत्येक कोपरा तपासण्यात आला. सुदैवाने, आतापर्यंतच्या तपासात कोणतीही संशयास्पद वस्तू किंवा स्फोटके आढळलेली नाहीत. विमानामध्ये कर्करोगावरील उपचारांसाठीचे रेडिओअॅक्टिव्ह औषध कायदेशीर परवानगीने नेले जात होते, त्याचीही तज्ञांमार्फत तपासणी करण्यात आली.
या घटनेमुळे प्रवाशांमध्ये काही काळ भीतीचे वातावरण होते, मात्र विमानतळ प्रशासनाने त्यांची योग्य सोय केली आहे. टिशू पेपरवर ही धमकीची चिठ्ठी कोणी लिहिली, याचा शोध घेण्यासाठी पोलीस सर्व प्रवाशांची चौकशी करत आहेत. ही धमकी निव्वळ खोडसाळपणा होती की त्यामागे काही कट होता, या दिशेने तपास सुरू आहे. आतापर्यंतच्या तपासणीनंतर प्रवाशांनी आणि अधिकाऱ्यांनी सुटकेचा नि:श्वास सोडला आहे.
