अहिल्यानगर |प्रतिनिधी| Ahilyanagar
कायनेटीक चौकातील स्वप्निल साईसुर्या परमीट रूम अ‍ॅण्ड फॅमिली रेस्टॉरन्ट येथे शहर पोलीस उपअधीक्षक अमोल भारती यांच्या पथकाने छापा टाकून आयपीएल सामन्यावर सट्टा (बेटिंग) लावत असलेल्या एकाला पकडले. शुभम दत्तात्रय भगत (वय 32 रा. जे. जे. गल्ली, मंगलगेट) असे त्याचे नाव आहे.
मंगळवारी (29 एप्रिल) रात्री दिल्ली कॅपिटल्स विरूध्द कोलकत्ता नाईट रायडर्स यांच्यात सुरू असलेल्या सामन्यादरम्यान पोलिसांनी ही कारवाई केली. पोलीस अंमलदार सचिन जाधव यांच्या फिर्यादीवरून शुभम भगत विरोधात कोतवाली पोलीस ठाण्यात गुन्हा दाखल करण्यात आला आहे. त्याच्या ताब्यातून मोबाईल, सिमकार्ड, बनावट आधारकार्ड असा 16 हजार रूपयांचा मुद्देमाल जप्त करण्यात आला आहे. पोलिसांनी केलेल्य प्राथमिक तपासात शुभम भगत याने स्वतःच्या मोबाईलवर 23 आयडी तयार करून, त्याचप्रमाणे 16 मोबाईल नंबरच्या माध्यमातून सट्टा लावत असल्याचे उघड झाले.
त्याने आयपीएल क्रिकेट बेटिंगसाठी चार मोबाईल हॅण्डसेट, स्वत:चे व बनावट दुसर्‍यांच्या नावाचे दोन आधार कार्ड, बुकी संपर्क यादी आणि कॉलिंग आयडी यादी वापरल्याचे निष्पन्न झाले. यापैकी दोन सिमकार्ड खोटी ओळख दर्शवून घेतल्याचेही तपासात स्पष्ट झाले आहे.
ही कारवाई पोलीस अधीक्षक राकेश ओला, अपर पोलीस अधीक्षक प्रशांत खैरे यांच्या सुचनेनुसार आणि उपअधीक्षक अमोल भारती यांच्या मार्गदर्शनाखाली पार पडली. या कारवाईत पोलीस उपनिरीक्षक दत्तात्रय शिंदे, अंमलदार सुयोग सुपेकर, सचिन जाधव, किरण बनसोडे, हेमंत खंडागळे, सागर व्दारके यांनी सहभाग घेतला. सदर गुन्ह्याचा पुढील तपास उपनिरीक्षक कृष्णकुमार सेदवाड हे करत आहेत.
एलसीबीची भूमिका संशयास्पद
आयपीएल सामने सुरू होऊन एक महिन्यापेक्षा जास्त कालावधी झाला आहे. अहिल्यानगर शहरासह जिल्ह्यात सर्रास सट्टा सुरू आहे. मात्र यावर एलसीबीकडून अद्याप एकही कारवाई करण्यात आलेली नाही. दरम्यान, एलसीबीत नियुक्त असलेल्या कर्मचार्‍यांची भूमिका संशयास्पद वाटत आहे. कारण अहिल्यानगर शहरातील ऐवढ्या मोठ्या प्रमाणात आयपीएल सट्टा सुरू असताना त्यांना एकही बुकी सापडत नसल्याने आश्चर्य व्यक्त होत आहे.
गंभीर कलमान्वये गुन्ह्याची नोंद
दरवर्षी आयपीएल सट्टा लावणार्‍यांवर पोलिसांकडून कारवाई केली जाते. मात्र त्यांच्यावर जुगार प्रतिबंध कायद्यानुसार गुन्हा नोंदविण्यात येत होता. यंदा उपअधीक्षक भारती यांनी कारवाई करून शुभम भगत विरोधात फसवणूक, बनावटीकरण, बनावट दस्तावेज तयार करणे आणि महाराष्ट्र जुगार प्रतिबंध कायदाचे कलम 4, 5 तसेच इतर संबंधित कलमांतर्गत गुन्हा दाखल केला आहे. या गुन्ह्यात संशयित आरोपीला सात वर्षापर्यंत शिक्षा होवू शकते. यामुळे आयपीएल सट्टा लावणार्‍यांसह बुकींचे धाबे दणाणले आहेत.
ते बुकी रडारवर
भगत याच्याकडून जप्त केलेल्या मोबाईलमध्ये व्हॉट्सअ‍ॅप चॅट्स, बुकींसोबत केलेल्या चर्चांचे स्क्रीनशॉट आणि बेटिंगसाठी वापरण्यात आलेली माहिती सापडली आहे. दरम्यान, शहरातील दाळमंडई, मंगलगेट, विनायकनगर, सारसनगर, पाईपलाईन रस्ता, गुलमोहर रस्ता, श्रीराम चौक, नेता सुभाष चौक, नेप्ती, केडगाव या भागातील मोठमोठे बुकींकडून आयपीएल सामन्यांवर सर्रास सट्टा खेळला जात आहे. ते बुकी देखील पोलिसांच्या रडारवर आले आहेत. त्यांच्यावर देखील कारवाईची मागणी होत आहे. तसेच मुंबई येथील बुकींचे कनेक्शन समोर आले आहे.
आयपीएल सट्ट्यासंदर्भात नागरिकांच्या तक्रारी प्राप्त झाल्या होत्या. दखल घेऊन कारवाई करण्यात आली आहे. यामध्ये 39 संशयित निष्पन्न झाले आहेत. यामध्ये नगरसह इतर ठिकाणच्या संशयित बुकींचा समावेश आहे. अधिक तपास सुरू असून यापुढे देखील कारवाई केली जाणार आहे.
– अमोल भारती, पोलीस उपअधीक्षक, अहिल्यानगर शहर.
