अहिल्यानगर |प्रतिनिधी| Ahilyanagar
केडगाव येथील कोतकर मळा परिसरात सामाईक रस्त्याच्या कारणावरून झालेल्या वादाचे रूपांतर हाणामारीत झाल्याची घटना घडली असून या प्रकरणी कोतवाली पोलिसांनी चौघांविरूध्द बुधवारी (24 जून) गुन्हा दाखल झाला आहे. या मारहाणीत तिघेजण जखमी झाले आहे.
याबाबत जखमी सहादू किमन कोतकर (वय 60, रा. कोतकर मळा, केडगाव) यांनी दिलेल्या जबाबावरून गुन्हा नोंद करण्यात आला आहे. माऊली ऊर्फ ज्ञानेश्वर कोतकर, ऋतुजा ज्ञानेश्वर कोतकर, सुमन ऊर्फ बबई यादव कोतकर, ऋषीकेश यादव कोतकर (सर्व रा. कोतकर मळा, केडगाव) अशी गुन्हा दाखल झालेल्या संशयित आरोपींची नावे आहेत. 21 जून 2026 रोजी रात्री 10.20 वाजण्याच्या सुमारास कोतकर मळा येथील सामाईक रस्त्यावर हा प्रकार घडला. सहादू कोतकर यांच्या फिर्यादीनुसार, संशयित आरोपींनी चाकूसारखे दिसणारे शस्त्र, दगड आणि लाकडी दांडक्यांचा वापर करून सहादू कोतकर, त्यांची पत्नी नंदा कोतकर आणि मुलगा सागर कोतकर यांना मारहाण केली.
तसेच लाथाबुक्क्यांनी मारहाण करून दाताने चावा घेत दुखापत केल्याचा आरोप करण्यात आला आहे. यावेळी शिवीगाळ करत तुम्ही येथे कसे राहता तेच पाहतो, अशी धमकीही दिल्याचे फिर्यादीत नमूद करण्यात आले आहे. दरम्यान, या गोंधळात नंदा कोतकर यांच्या गळ्यातील सुमारे 7.50 ग्रॅम वजनाचे सोन्याचे मंगळसूत्र गहाळ झाल्याची फिर्यादीत नमूद करण्यात आले आहे. पोलीस अंमलदार विश्वास गाजरे अधिक तपास करीत आहेत.
