नाशिक | प्रतिनिधी
नाशिकचे पोलीस आयुक्त विश्वास नांगरे-पाटील यांचे तरुणांना व लहानग्यांना नेहमीच आकर्षण असते. या बाबतचे अनेक प्रसंग देखील समोर आले आहेत. ट्युमर झालेल्या मास्टर साई गणेश पांचाळ (वय 11 वर्षे) रा. उस्मानाबाद याने देखील विश्वास नांगरे-पाटील यांना भेटण्याची इच्छा व्यक्त केलेल्या पुन्हा याचा प्रत्यय आल्याचे पाहायला मिळाले.
सध्या मास्टर साई एच सी जि मानवता कॅन्सर सेंटर रुग्णालयात उपचार सुरू आहे. उपचारा दरम्यान मास्टर साईने विश्वास नांगरे-पाटील यांना भेटण्याची इच्छा व्यक्त केली, डॉक्टर राज नगरकर यांनी क्षणाचाही विलंब न लावता पूर्ण करण्याचे आश्वासन दिले. रुग्णालयातील डॉक्टर्सने ताबडतोब हालचाली करत मास्टर साईची इच्छा नांगरे-पाटील यांच्या पर्यंत पोहोचवली. नांगरे-पाटील यांनी ही आपल्या कामातून वेळ काढत त्याला भेटायचे ठरवले.
काही वेळा नंतर विश्वास नांगरे-पाटील यांच्या कार्यालयात भेट देण्यात आली. त्याला भविष्यात त्यांच्या सारखा अधिकारी होण्यासाठी स्वतः पोलीस आयुक्त यांच्या खुर्चीवर बसून प्रेरित केले व भावी वाटचालीस शुभेच्छा दिल्या. या वेळी ट्युमर सारख्या मोठ्या आजाराशी लढत असलेल्या मास्टर साईला आकाश ठेंगणं झाले आणि तो आनंद त्याच्या चेहऱ्यावरही दिसत होता.
