नाशिक । प्रतिनिधी
वारकरी संप्रदायाचे श्रद्धास्थान असलेले संत निवृत्तीनाथ महाराज देवस्थानच्या जमीनींची विक्री केली जाऊ नये, अशी मागणी निवृत्तीनाथ संस्थान विश्वस्तांनी केली आहे. सोमवारी (दि.2) याबाबतचे निवेदन निवासी उपजिल्हाधिकारी भागवत डोईफोडे यांना देण्यात आले. या प्रकरणी डोईफोडे यांनी प्रातंधिकार्‍यांना सूचना दिल्या आहेत.
त्र्यंबकेश्वर येथील गट नं. 354 ही जमीन जुन्या दस्तऐवजावरील नोंद बघता इनामी जमिन आहे. ही जमिन निवृत्तीनाथ महाराज मंदिरासाठी असल्याची कागदोपत्री स्पष्ट नोंद आहे. याबाबत देवस्थानच्या पाच विश्वस्तांनी या जमीनीच्या खरेदी-विक्रीबाबत तत्काळ मनाई हुकूम काढण्यासाठी जिल्हा प्रशासनाला निवेदन दिले आहे. निवासी उपजिल्हाधिकारी भागवत डोईफोडे यांनी प्राताधिकार्‍यंना या संदर्भात खरेदी विक्रीच्या व्यवहार स्थगीत करण्याच्या सूचना दिल्याचे विश्वस्तांनी सांगितले.
संस्थांनेचे विश्वस्त त्र्यंबक गायकवाड, ललिता शिंदे, पुंडलिक थेटे, जिजाबाई लोंढे, पंडित कोल्हे, रामभाऊ मुळाणे यांनी निवेदन देताना गाव नमुना नं. 3 च्या 1 ते 20 नक्कलीनुसार नोंद वहीतील अनुक्रमांक 14 व 19 अन्वये गट नं. 354 हा देवस्थान इनाम असलेले कागदपत्रे दिली आहेत. तत्कालीन तहसीलदार कार्यालयाने इनाम रद्द करून भोगवटदार 1 नोंद केल्याचा आरोप या निवेदनातून करण्यात आला आहे. तसेच या जमीनीवरी इनाम रद्द करण्याच्या कारवाईची चौकशी करून संबधित जमिनीच्या खरेदी विक्री व्यवहारांना मनाई हूकुम करण्याची मागणी करण्यात आली आहे.
