Maharashtra Cabinet Expansion : बावनकुळे, मुंडे, भुसे यांच्यासह ३९ जणांनी घेतली मंत्रिपदाची शपथ

नागपूर | Nagpur

लोकसभा निवडणुकीत मोठा फटका बसल्यानंतर महाराष्ट्र विधानसभा निवडणुकीत महायुतीने जोरदार कमबॅक करत अभूतपूर्व यश मिळवले. राज्यात महायुतीला २३५ जागांवर घवघवीत बहुमत मिळाले. तर महाविकास आघाडीला मात्र ४९ जागांवरच समाधान मानावे लागले. त्यानंतर तब्बल १२ दिवसांनी म्हणजेच ५ डिसेंबर रोजी देवेंद्र फडणवीस यांनी मुख्यमंत्रीपदाची तर एकनाथ शिंदे आणि अजित पवार यांनी उपमुख्यमंत्रीपदाची शपथ घेतली. त्यानंतर (आज दि.१५ डिसेंबर) रोजी नागपूर येथील राजभवनात मंत्रिमंडळाचा पहिला विस्तार पार पडला. यात ३३ आमदारांनी कॅबिनेट तर ६ जणांनी राज्यमंत्रीपदाची शपथ घेतली.

यावेळी भाजपचे प्रदेशाध्यक्ष चंद्रशेखर बावनकुळे यांनी सुरुवातीला कॅबिनेट मंत्रिपदाची शपथ घेतली. त्यानंतर भाजपकडून राधाकृष्ण विखे पाटील, शिवेंद्रराजे भोसले, चंद्रकांत पाटील, पंकजा मुंडे, गिरीश महाजन, गणेश नाईक, मंगलप्रभात लोढा, आशिष शेलार, नितेश राणे, अतुल सावे, अशोक उईके, आकाश फुंडकर, संजय सावकारे यांनी कॅबिनेट मंत्रिपदाची शपथ घेतली. तर माधुरी मिसाळ, पंकज भोयर आणि मेघना बोर्डीकर यांनी राज्यमंत्रीपदाची शपथ घेतली.

तर शिवसेनेकडून भरत गोगावले, उदय सामंत, प्रताप सरनाईक, शंभूराजे देसाई, प्रकाश आबिटकर,संजय शिरसाट, संजय राठोड, दादा भुसे आणि गुलाबराव पाटील यांनी कॅबिनेट मंत्रि‍पदाची शपथ घेतली. तर योगेश कदम आणि आशिष जैस्वाल यांनी राज्यमंत्रीपदाची शपथ घेतली.

तसेच अजित पवारांच्या राष्ट्रवादीकडून (Ajit Pawar NCP) आदिती तटकरे, बाबासाहेब पाटील, दत्तामामा भरणे, हसन मुश्रीफ, नरहरी झिरवाळ, मकरंद पाटील, माणिकराव कोकाटे आणि धनंजय मुंडे यांनी कॅबिनेट मंत्रि‍पदाची शपथ घेतली. तर इंद्रनील नाईक यांनी राज्यमंत्री म्हणून शपथ घेतली.