अहिल्यानगर |प्रतिनिधी| Ahilyanagar
नुकत्याच पारपडलेल्या 67 व्या महाराष्ट्र केसरी कुस्ती स्पर्धेतील विजेत्या व पदक प्राप्त मल्लांना गुरूवार (दि. 13) रोजी नगरमध्ये होणार्‍या कार्यक्रमात बक्षीसांचे वितरण करण्यात येणार आहे. या बक्षीसांमध्ये दोन चारचाकी गाड्या, बुलेट व अन्य दुचाकी गाड्या व सोन्यांच्या अंगठ्यांचा यांचा समावेश आहे. हा परितोषिक वितरण समारंभ राज्य कुस्तीगीर संघाचे नूतन उपाध्यक्ष व स्पर्धेचे संयोजक आ. संग्राम जगताप व राज्य कुस्तीगीर संघाचे सचिव, हिंद केसरी योगेश दोडके यांच्या हस्ते होणार आहे, अशी महिती राज्य कुस्तीगीर संघाचे कार्याध्यक्ष पै. संदीप भोंडवे यांनी दिली.
नगर येथे नुकत्याच झालेल्या 67 व्या वरिष्ठ राज्य अजिंक्यपद व महाराष्ट्र केसरी कुस्ती स्पर्धेतील गादी व माती विभागातील पदक विजेत्या कुस्तीगीरांना स्पर्धा आयोजक व राज्य कुस्तीगीर संघाचे उपाध्यक्ष आ. जगताप यांनीही बक्षीसे देण्याचे घोषित केले होते. त्यानुसार फोर व्हीलर, बुलेट, टु व्हीलर गाड्या स्पर्धेच्या क्रीडानगरीत ठेवण्यात आल्या होत्या. आता या गाड्यांचा व सोन्याच्या अंगठ्यांचे परितोषिक वितरण समारंभ आ.जगताप यांच्या हस्ते होणार आहे.
यामध्ये महाराष्ट्र केसरी किताब विजेता, उपविजेता यांच्यासह माती विभागातील 30 व गादी विभागातील 40 कुस्तीगीरांना बक्षिसे देण्यात येणार आहेत. अधिक माहितीसाठी व कागदपत्रे जमा करण्यासाठी जिल्हा कुस्तीगीर संघाचे सचिव डॉ. संतोष भुजबळ व कार्यालयीन सचिव निलेश मदने यांच्याशी संपर्क करावा, असे आवाहन जिल्हा कुस्तीगीर संघाच्यावतीने करण्यात आले आहे.
