श्रीरामपूर |प्रतिनिधी| Shrirampur
अल्पवयीन मुलीस पळवून नेणार्‍या देवळाली प्रवरा येथील आरोपीस राहुरी फॅक्टरी परिसरातून पोलिसांनी शिताफीने अटक केली. श्रीरामपूर शहर पोलिसांनी ही कारवाई केली.
याबाबत पोलीस सूत्रांकडून मिळालेली अधिक माहिती अशी की, दि. 8 जून 2023 रोजी रात्री 10 ते पहाटे 5 वाजेच्या दरम्यान राहत्या घरातून अल्पवयीन मुलीस कशाचे तरी आमिष दाखवुन े संमतीशिवाय पळवुन नेल्याची फिर्याद या मुलीच्या वडिलांनी दिली होती. या तक्रारीवरुन श्रीरामपूर शहर पोलीस स्टेशन येथे भादंवि कलम 363 प्रमाणे गुन्हा दाखल करण्यात आला होता.
सदरचा गंभीर स्वरुपाचा गुन्हा दाखल होताच पोलीस निरीक्षक हर्षवर्धन गवळी यांनी सदर आरोपीचा शोध घेण्याचे आदेश तपास पथकास दिले. त्यानुसार तपास पथकाने आरोपी व अल्पवयीन मुलीचा शोध चालु केला. मोबाईल ट्रॅकींग, सीडीआर/एसडीआर रिपोर्ट तसेच फेसबुक, व्हॉट्सअप, इंस्टाग्राम अशा सोशल मीडियाच्या माध्यमातून शोध सुरु केला. पोलीस आपल्या मागावर असल्याची भनक आरोपीस लागल्याने सदर अल्पवयीन मुलीस दि. 10 जून 2023 रोजी सायंकाळी 6 वाजण्याच्या सुमारास राहुरी फॅक्टरी येथे सोडुन आरोपी निघून गेला होता.
सदर अल्पवयीन मुलीस विश्वासात घेवुन विचारपुस केली असता तिच्या शाळेचा बसचालक विजय गोविंद गोडसे (रा. देवळालीप्रवरा, ता. राहुरी, जि. अहमदनगर) याने माझे तुझ्यावर खुप प्रेम आहे, तुझे आई-वडील तुला नेहमी त्रास देतात, ते मला पाहवत नाही, आपण त्यांच्यापासुन लांब कुठेतरी निघून जावू, असे बोलून मला राहत्या घरातून घेवून गेला. मी अल्पवयीन असल्याचे माहित असताना त्याने माझ्यावर लैंगिक अत्याचार केला, असा जबाब मुलीने दिल्याने सदर दाखल गुन्ह्यात भांदवि कलम 366, 366 (अ), 376 पोक्सो कलम 4, 5 (फ), 6,11,12 प्रमाणे वाढ करुन आरोपीचा शोधासाठी दोन वेगवेगळी पथके करुन शोध सूरू केला.
दि. 16 जून 2023 रोजी पोलीस निरीक्षक हर्षवर्धन गवळी यांना सदर गुन्ह्यातील आरोपी रात्री 9 वा. सुमारास राहुरी फॅक्टरी परीसरात येणार असल्याची माहिती मिळाल्याने श्री. गवळी यांच्या आदेशाने या परिसरात तपास पथकाने सापळा रचून आरोपीला ताब्यात घेत अटक केली.
