संगमनेर |तालुका प्रतिनिधी| Sangamner
गेल्या आठ दिवसांपूर्वी संगमनेरचे आमदार अमोल खताळ यांनी प्रशासनासोबत बैठक घेऊन सर्व अवैध धंदे बंद करुन कारवाईच्या सूचना दिल्या होत्या. मात्र त्यांच्या या सूचनांकडे महसूल व पोलिसांनी दुर्लक्ष केले. कारवाई होत नसल्याने आमदारांनी स्वतः रात्री 12 वाजता समनापूर (ता.संगमनेर) येथे साठवून ठेवलेली वाळू डंपरमध्ये भरून घेऊन जात असताना रायतेवाडी शिवारातील तनपुरवाडी रस्त्यावर रविवारी (दि.4) रात्री बारा वाजेच्या सुमारास पकडून पोलिसांच्या स्वाधीन केली. याप्रकरणी संगमनेर शहर पोलिसांनी दोघा वाळूतस्करांसह एका डंपर चालकावर गुन्हा दाखल केला आहे.
आमदार अमोल खताळ हे रात्री उशिरा रायतेवाडी येथे एका कार्यक्रमासाठी जात असताना त्यांना तनपुरवाडी रस्त्यावरून वाळूने भरलेला डंपर येताना दिसला. त्याचक्षणी त्यांनी आपले वाहन थांबवत खाली उतरले आणि त्या डंपर चालकाकडे विचारपूस करत चांगलेच धारेवर धरले. त्यावेळी डंपर चालकाने उडवाउडवीची उत्तरे दिली. त्यानंतर आमदारांनी ही माहिती तहसीलदार धीरज मांजरे यांना भ्रमणध्वनीवरून देत पोलिसांत गुन्हा दाखल करण्याच्या सूचना केल्या. त्यानुसार महसूल व पोलीस पथक घटनास्थळी दाखल झाले. पथकाने वाळूने भरलेला 10 लाख रुपये किमतीचा डंपर आणि 15 हजार रुपये किमतीची 3 ब्रास वाळू असा एकूण 10 लाख 15 हजार रुपये किमतीचा मुद्देमाल जप्त केला आहे.
याबाबत शहर पोलिसांत सहायक पोलीस निरीक्षक विश्वास भान्सी यांनी दिलेल्या फिर्यादीवरून डंपर चालक अरबाज इसाक इनामदार (वय 24, रा. सावरगाव घुले, ता. संगमनेर), वाळूतस्कर शुभम सारंगधर वामन (रा. कोल्हेवाडी, ता. संगमनेर) व गोरख हासे (पूर्ण नाव माहित नाही रा. समनापूर) यांच्या विरोधात पर्यावरण संरक्षण कायद्यानुसार गुन्हा दाखल केला आहे. अधिक तपास पोलीस निरीक्षक रवींद्र देशमुख यांच्या मार्गदर्शनाखाली पोलीस हेडकॉन्स्टेबल भांगरे करत आहेत.
‘त्या’ वाळूतस्कराला कुणाचा आशीर्वाद ?
संगमनेर शहर व तालुक्यात दररोज अवैध वाळू उपसा होत आहे. समनापूर परिसरातील वजनदार वाळूतस्कर दिवसरात्र कृत्रिम वाळूच्या नावाखाली अवैध वाळू वाहतूक करत आहेत. परंतु त्यांच्यावर प्रशासन मेहेरबान असल्याने कारवाई झाली नाही. मात्र आता चक्क आमदार अमोल खताळ यांनी स्वतः रायतेवाडी (तनपुरवाडी) येथे वाळूने भरलेला डंपर ताब्यात घेत प्रशासनाच्या ताब्यात दिला आहे. मग पोलीस व महसूल प्रशासन नेमके करते तरी काय? असा सवाल उपस्थित होत आहे.
