घोटी । प्रतिनिधी Ghoti
इगतपुरी तालुक्यातील खेडभैरवच्या परदेशवाडीतील तरुणाचा अज्ञात मारेकर्यांनी खून केला. घोटी पोलीस ठाण्यात अज्ञात मारेकर्यांविरुद्ध गुन्हा दाखल करण्यात आला आहे. मृत तरुणांचे वडील नितीन कचरू आगविले यांनी घोटी पोलीस ठाण्यात फिर्याद दाखल केली आहे.
फिर्यादीनुसार समाधान नितीन आगविले, वय 21 वर्षे हा तरुण दि. 21 ऑक्टोबरला रात्री 8 वाजता त्याची पत्नी कोमलला बस स्टँडवर जाऊन येतो, असे घरी सांगून बाहेर गेला होता. रात्रीचे 12 वाजले तरी समाधान घरी न आल्याने त्याची पत्नी कोमलने फोन केला असता मी बस स्टँडवरून निघालो आहे, असे समाधानने सांगितले.
मात्र रात्री दीड वाजून गेला तरी तो घरी न आल्याने त्याचे वडील त्याला शोधण्यासाठी बसस्टँडकडे निघाले. घरापासून 1 किलोमीटर अंतरावर समाधान रक्ताच्या थारोळ्यात पडलेला दिसून आला. त्याला घोटी ग्रामीण रुग्णालयात नेण्यात आले. डॉक्टरांनी समाधानची तपासणी करून त्यास मृत घोषित केले. पुढील तपास पोलीस निरीक्षक विनोद पाटील यांच्या मार्गदर्शनाखाली पोलीस करीत आहेत.
