नंदुरबार। Nandurbar
सातपुडा पर्वतरांगांमधील देवगोई घाट परिसरातून एक अत्यंत भीषण अपघाताची बातमी समोर आली आहे. विद्यार्थ्यांना घेऊन जाणारी एक स्कूल बस अचानक शंभर ते दीडशे फूट खोल दरीत कोसळली. या भीषण अपघातात एका विद्यार्थ्याचा दुर्दैवी मृत्यू झाला असून, अनेक विद्यार्थी जखमी झाले आहेत.
मिळालेल्या प्राथमिक माहितीनुसार, ही दुर्घटना नंदुरबारमधील सातपुडा डोंगररांगेतील देवगोई घाट परिसरात घडली. ही स्कूल बस विद्यार्थ्यांना घेऊन जात असतानाच तिचा ताबा सुटला आणि ती थेट खोल दरीत कोसळली. हा अपघात इतका भीषण होता की, बसचे मोठे नुकसान झाले आहे.
अपघाताच्या वेळी बसमध्ये अंदाजे २० ते ३० विद्यार्थी प्रवास करत होते. बस दरीत कोसळल्याने या सर्व विद्यार्थ्यांना गंभीर दुखापत झाली आहे. या विद्यार्थ्यांपैकी एका विद्यार्थ्याचा जागीच मृत्यू झाल्याची माहिती समोर आली आहे.
अपघाताची माहिती मिळताच स्थानिकांनी आणि तातडीने बचाव पथकाने घटनास्थळी धाव घेतली. दरीत कोसळलेल्या विद्यार्थ्यांना बाहेर काढण्याचे आणि त्यांना सुरक्षित ठिकाणी पोहोचवण्याचे काम युद्धपातळीवर सुरू आहे.
बचाव पथकाच्या मदतीने जखमी विद्यार्थ्यांना तात्काळ नजीकच्या रुग्णालयात दाखल करण्यात येत आहे. जखमी विद्यार्थ्यांवर तातडीने उपचार सुरू करण्यात आले असून, मृतांचा आकडा वाढू नये यासाठी प्रशासनाकडून सर्वतोपरी प्रयत्न केले जात आहेत.
