नाशिक | प्रतिनिधी | Nashik
पिझ्झाची (Pizza) ऑर्डर देत पैसे देण्यास नकार देऊन पिझ्झा सेंटरची तोडफोड करणाऱ्या त्रिकुटास म्हसरूळ पोलिसांनी (Mhasrul Police) चोवीस तासांत जेरबंद केले आहे. म्हसरूळ येथील गोरक्षनगर परिसरातील एका पिझा रेस्टॉरंट येथे हा गोंधळ झाला होता. गर्दीमुळे (Crowd) पिझा देण्यासाठी वेळ लागेल असे सांगितल्याचा राग आल्याने व पैसे देगार नाही, असे सांगून तिघांनी तोडफोड केल्याची घटना रविवारी (दि.२) दुपारी घडली होती.
सुरज बाळासाहेब फड, निरज दीपक खैरनार व साहिल कैलास गायकवाड (तिघे रा. स्नेहनगर, दिंडोरी रोड) अशी त्रिकुटातील संशयितांची (Suspected) नावे आहेत. दादाजी किसन मोहिते (३७, रा. म्हसरुळ) यांच्या फिर्यादीनुसार, रविवारी दुपारी तीनच्या सुमारास ते रेस्टॉरंटमध्ये असताना संशयितांनी पिझ्झाची मागणी केली. मात्र, ग्राहकांची गर्दी असल्याने काही थांबा असे कर्मचाऱ्याने संशयितांना सांगितले. मात्र ‘आम्हाला आताच पिझ्झा द्या, पैसे देणार नाही’, असे बोलून संशयितांनी काऊंटावरील संगणक, प्रिंटर, पिझा मेकरची तोडफोड (Vandalized) करीत कर्मचाऱ्यांनाही शिवीगाळ केली. घटनेनंतर संशयित पसार झाले होते.
दरम्यान, याप्रकरणी म्हसरुळ पोलीस ठाण्यात गुन्हा दाखल करण्यात आला. वरिष्ठ पोलिस निरीक्षक अतुल डहाके यांच्या सूचनेने गुन्हे शोध पथकाचे उपनिरीक्षक दीपक पटारे, मनोहर क्षीरसागर, अंमलदार बाळासाहेब मुर्तडक, सतीश बसावे, प्रशांत वालझडे, प्रशांत देवरे यांच्या पथकाने संशयितांचा शोध घेतला. तिघे संशयित स्नेहनगर परिसरात असल्याची माहिती मिळताच पोलिसांनी तिघांनाही पकडले. तिघांनी तोडफोड (Vandalized) करीत परिसरात दहशत निर्माण करण्याचा प्रयत्न केला होता. याबाबत तपास सुरु आहे.
