त्र्यंबकेश्वर | वार्ताहर | Trimbakeshwar
त्र्यंबकेश्वर मंदिरात (Trimbakeshwar Temple) दर्शनासाठी जास्त पैसे घेऊन खोटे पास विकल्याचा प्रकार उघडकीस आला आहे. सहाशे रुपये किमतीचे दर्शन तिकिटे तब्बल दोन हजार रुपयांना विकली यासंदर्भात सदर यात्रेकरू भाविकांनी (Devotees) मंदिर ट्रस्ट व पोलिसांकडे तक्रार दाखल केली आहे. यामुळे भाविकांमध्ये व नगरीत मोठी खळबळ उडाली आहे.
याबाबत अधिक माहिती अशी की, त्र्यंबकेश्वर मंदिर दर्शनासाठी नेहमीच भाविकांच्या रांगा असतात. ही गर्दी लक्षात घेऊन दि. २२ मार्च रोजी गुजरातच्या सुरतमधील चिराग दालिया व त्यांच्या मित्रांनी त्र्यंबकेश्वर मंदिर परिसरात एका अनोळखी व्यक्तीकडून दोनशे रुपये किंमतीचे ऑनलाईन सहाशे रुपयांची तीन तिकिटे दोन हजार रुपयांना विकत घेतली. मात्र, मंदिर गेटवर त्यांना सदर तिकीट स्कॅनिंग यंत्रणेने नाकारले. त्यामुळे भाविकाला दर्शन (Darshan) घेता आले नाही.
यानंतर सदर भाविकांनी त्र्यंबकेश्वर मंदिर ट्रस्ट कार्यालयात लेखी तक्रार केली. त्यानंतर ट्रस्टने पोलिसांकडे (Police) याबाबत तक्रार दिली असता अदखलपात्र गुन्हा दाखल करण्यात आला होता.यावेळी सीसीटीव्ही तपासात संशयित नारायण मुर्तडक या तरुणाने ही तिकिटे विकल्याचे दिसून आले. यानंतर याप्रकरणी त्र्यंबकेश्वर देवस्थान ट्रस्टचे मुख्य कार्यकारी अधिकारी अमित माचवे यांनी पोलिसांकडे मुर्तडक याच्याविरुद्ध ठकबाजीचा गुन्हा नोंदवला आहे.
दरम्यान, दर्शनासाठी वारंवार भाविकांना टोकले जाते. परंतु, त्यात ट्रस्ट व पोलीस हे तक्रारीत लक्ष घालत नव्हते. यानंतर आता उशिराने का होईना संबंधित कारवाई करतील असे भाविकांना वाटत आहे. तसेच असे तिकिटे अहस्तांतरणीय असताना बोगस तिकीटे दिसून आली. त्यामुळे आता या तिकिटांवर संबंधित भाविकांचा फोटो (Photo) छापावा अशी मागणी केली जात आहे.
