नाशिक । प्रतिनिधी
जिओ प्लॅटफॉर्मवर गुंतवणूकीसाठी परदेशी गुंतवणूकदारांची रिघ लागली आहे. गेल्या सहा आठवड्यांत सहावी मोठी गुंतवणूक झाली आहे. अबू धाबीच्या मुबाडला इन्व्हेस्टमेंट कंपनीने जिओ प्लॅटफॉर्ममध्ये १.८५ टक्के इक्विटीसाठी ९,०९३.६० कोटी रुपयांची गुंतवणूक जाहीर केली आहे. रिलायन्स इंडस्ट्रीज लिमिटेडने शुक्रवारी ही माहिती दिली.
मुबाडला यांनी जिओ प्लॅटफॉर्मचे इक्विटी मूल्य ४.९१ लाख कोटी रुपये ठेवले. फेसबुकच्या गुंतवणूकीने जिओ प्लॅटफॉर्मवर सुरू झालेली गुंतवणूक थांबलेली नाही. आतापर्यंत जिओ प्लॅटफॉर्मवर एकूण ६ बड्या गुंतवणूकदारांनी ८७,६५५.३५ कोटी रुपयांची गुंतवणूक केली आहे. फेसबुकने प्रथम गुंतवणूक केली . त्याखालोखाल जगातील आघाडीचे गुंतवणूकदार सिल्व्हर लेक, व्हिस्टा इक्विटी पार्टनर्स, जनरल अँटलांटिक आणि केकेआर आणि आता मुबाडला इन्व्हेस्टमेंट कंपनी गुंतवणूक करत आहे.
रिलायन्स इंडस्ट्रीजचे चेअरमन व व्यवस्थापकीय संचालक मुकेश अंबानी म्हणाले की,जगातील एक उत्तम आणि परिवर्तनशील गुंतवणूकदार असलेल्या मुबाडलाने आमच्याबरोबर भागीदारी करण्याचा निर्णय घेतल्यामुळे मला आनंद झाला. ते भारताला डिजिटल राष्ट्र बनवण्याच्या आमच्या प्रवासात भागीदार असतील,अबूधाबीशी माझे दीर्घकाळचे संबंध आहेत आणि मी पाहिले आहे की यूएईच्या ज्ञान आधारित अर्थव्यवस्थेला जगाशी जोडण्यासाठी आणि विविधतेला रंग देण्यामध्ये मुबाडला यांनी प्रचंड काम केले आहे. आम्ही मुबाडला च्या अनुभवाचा लाभ घेण्यास उत्सुक आहोत.
कंपनीने आपल्या निवेदनात म्हटले आहे की,रिलायन्स इंडस्ट्रीज लिमिटेडची संपूर्ण मालकीची सहाय्यक कंपनी जिओ प्लॅटफॉर्म ही नेक्स्ट जनरेशन तंत्रज्ञान कंपनी आहे आणि यामुळे भारताला डिजिटल समाज बनण्यास मदत होईल.
मुबाडला इन्व्हेस्टमेंट कंपनीचे व्यवस्थापकीय संचालक आणि गट मुख्य कार्यकारी अधिकारी खालेदुन अल मुबारक म्हणाले, जिओने भारतातील कम्युनिकेशन आणि कनेक्टिव्हिटी कशी बदलली हे आपण पाहिले आहे आणि एक गुंतवणूकदार आणि भागीदार म्हणून आम्ही भारताच्या डिजिटल विकास प्रवासाला समर्थन देण्यास वचनबद्ध आहोत.
