नाशिक | प्रतिनिधी | Nashik
सिंहस्थ कुंभमेळ्याच्या पार्श्वभूमीवर शहरातील रस्ते मोकळे करण्यासाठी नाशिक महापालिका आणि पोलिस प्रशासनाने (Nashik Municipal Corporation and Police Administration) आज (दि.०९) रोजी अतिक्रमणांविरोधात मोठी कारवाई करत ४० ते ५० पक्की दुकाने व टपऱ्यांवर बुलडोझर चालवून जमीनदोस्त करण्यात आले.
ही कारवाई आज पहाटेपासून प्रभाग क्रमांक १४ मधील सारडा सर्कल (Sarada Circle Area) ते हॉटेल चित्रकूट परिसरातील अनधिकृत दुकाने आणि टपऱ्यांवर करण्यात आली. पहाटे सहा वाजेपासून सुरू झालेल्या या मोहिमेत शेकडो अधिकारी व कर्मचाऱ्यांनी भाग घेतला.
नाशिक महापालिकेच्या (Nashik NMC) विकास आराखड्यातील ३० मीटर डी.पी. रस्त्यात बाधित होत असलेल्या बांधकामांवर ही कारवाई करण्यात आली. शहरातील वाहतूक कोंडी कमी करणे, रस्ता रुंदीकरण आणि आगामी सिंहस्थासाठी आवश्यक पायाभूत सुविधा उभारण्याच्या दृष्टीने प्रशासनाने ही धडक मोहीम हाती घेतली आहे.
