नाशिक | Nashik
मागील आठवड्यात नाशिक जिल्हा परिषदेच्या (Nashik Zilla Parishad) मुख्य कार्यकारी अधिकारी आशिमा मित्तल (Ashima Mittal) यांची जालना (Jalna) येथे जिल्हाधिकारी म्हणून बदली झाली होती. त्यामुळे जिल्हा परिषदेच्या मुख्य अधिकारी कोणाची नियुक्ती होणार याकडे सर्वांचे लक्ष लागले होते. त्यानंतर आता सरकारकडून मुख्याधिकाऱ्यांची नियुक्ती करण्यात आली आहे.
त्यानुसार नाशिक जिल्हा परिषदेच्या मुख्य कार्यकारी अधिकारीपदी ओंकार पवार (Omkar Pawar) यांची नियुक्ती करण्यात आली आहे. पवार हे इगतपुरी त्र्यंबकेश्वर उपविभागाचे प्रांताधिकारी तथा सहाय्यक जिल्हाधिकारी या पदावर कार्यरत होते. त्यानंतर आज सरकारकडून त्यांची नाशिक जिल्हा परिषदेच्या मुख्य कार्यकारी अधिकारीपदी नियुक्ती करण्यात आली आहे. ते उद्याच (बुधवारी) आपल्या पदाचा पदभार स्वीकारण्याची शक्यता आहे.
ओंकार पवार हे भारतीय प्रशासकीय सेवेतील अधिकारी (IAS) असून त्यांची पहिली नियुक्ती इगतपुरीमध्ये होती. ते १६ ऑक्टोबर २०२४ पासून इगतपुरी येथे कार्यरत होते. या काळांत त्यांनी इगतपुरी व त्र्यंबकेश्वरसाठी (Igatpuri and Trimbakeshwar) चांगले निर्णय घेतल्याने त्यांचे या भागातील नागरिकांनी स्वागत केले होते. यानंतर आता त्यांची नाशिक जिल्हा परिषदेच्या मुख्य कार्यकारी अधिकारीपदी नियुक्ती करण्याचे आदेश व्ही. राधा यांनी दिले आहेत.
