नाशिक | प्रतिनिधी | Nashik
शहरातील द्वारका सर्कल (Dwarka Circule) येथे शनिवारी दुपारी पोलीस व्हॅनला एसटी बसने धडक दिल्याने झालेल्या अपघातात इंदिरानगर पोलिसांनी (Indiranagar Police) फसवणुकीच्या गुन्ह्यात अटक केलेले दोन संशयित जखमी झाले आहेत. गुन्हेशोध पथक तपासासाठी या दोघांसह पंचांना घेऊन आडगाव येथे जात असताना ही घटना घडली. सुदैवाने पोलीस कर्मचारी बचावले असून संशयित भिमराव कोंडीबा वाघमारे व रविंद्र हरिदास अडांगळे यांना दुखापत झाली आहे.
इंदिरानगर पोलिसांची व्हॅन शनिवारी (दि. १७) दुपारी दोन वाजता द्वारका चौकातून आडगावकडे मार्गस्थ होत असताना पाठीमागून आलेल्या शिंदखेडा आगाराच्या एसटी बसवरील संशयित चालक विकास वैजनाथ जायभाये याने जोरदार धडक दिली. त्यात व्हॅनमधील दोघांनी मुका मार लागून ते जखमी झाले. त्यांना तातडीने जिल्हा रुग्णालयात उपचारासाठी दाखल करण्यात आले. प्राथमिक तपासणीत दोघांनाही किरकोळ मार लागल्याचे समोर आले असून प्रकृती स्थिर असल्याची माहिती वैद्यकीय सूत्रांनी दिली.
अपघातानंतर (Accident) काही काळ परिसरात वाहतुकीची कोंडी निर्माण झाली. वाहतूक पोलिसांनी धाव घेत ट्रॅफिक सुरळीत केली. या प्रकरणी पोलीस व्हॅनचे चालक हवालदार सौरभ माळी यांनी भद्रकाली पोलिस ठाण्यात फिर्याद दिली आहे. त्यानुसार बसचालकाविरुद्ध निष्काळजीपणे वाहन चालवून अपघात घडविल्याप्रकरणी गुन्हा दाखल करण्यात आला आहे. संशयितांच्या प्रकृतीत सुधारणा झाल्यानंतर त्यांना पुन्हा ताब्यात घेतले जाणार असून, अपघातात व्हॅनचे नुकसान झाले आहे. तपास हवालदार डी. एस. रेहरे करत आहेत.
संशयितांवरील आरोप
१९ सप्टेंबर २०२५ मध्ये संशयित संशयित रितेश रमेश संसारे, अनोळखी पुरुष व महिला, भिमराव वाघमारे, मुकेश जाधव, रविंद्र अडांगळे, शरद मुठेकर, अॅड कपिल अरविंद पाठक यांनी चेतनानगर भागात संगनमत केले. फिर्यादी संतोष संजीवा हेगडे या व्यावसायिकासह त्याच्या पत्नीच्या नावे असलेल्या प्लॉटची परवानगी न घेता बनावट पॅनकार्ड व आधारकार्डचा वापर करत परस्पर विक्री केल्याच्या आरोपानुसार गुन्हा नोंद आहे. याच गुन्ह्याच्या तपासासाठी वाघमारे व अडांगळेला पोलिस कोठडीद्वारे आडगाव येथे नेले जात होते.
