बारामती । Baramati
राज्याच्या राजकारणात आणि समाजकारणात खळबळ उडवून देणाऱ्या नाशिकमधील ‘टीसीएस’ (TCS) धर्मांतर प्रकरणाला आता एक नवे आणि अत्यंत मोठे वळण मिळाले आहे. या प्रकरणातील मुख्य सूत्रधार मानली जाणारी आरोपी निदा खान हिला महिनाभर आश्रय देणाऱ्या छत्रपती संभाजीनगरमधील एमआयएम (AIMIM) नगरसेवक मतीन पटेल यांच्या घरावर आज, १३ मे रोजी पहाटे महापालिकेने बुलडोझर चालवला. या कारवाईने गुन्हेगारांना पाठिशी घालणाऱ्यांचे धाबे दणाणले असून, प्रशासनाच्या या आक्रमक पवित्र्याचे नागरिकांकडून स्वागत होत आहे.
नाशिकमध्ये धर्मांतराचे रॅकेट उघडकीस आल्यापासून निदा खान फरार होती. पोलीस तिचा कसून शोध घेत होते, मात्र ती पोलिसांना हुलकावणी देण्यात यशस्वी ठरत होती. अखेर तांत्रिक तपासाच्या आधारे पोलिसांना ती छत्रपती संभाजीनगरमध्ये लपल्याची खात्री पटली. ७ मे रोजी रात्री उशिरा पोलिसांनी सापळा रचून तिला ताब्यात घेतले. तपासादरम्यान धक्कादायक बाब समोर आली की, निदा खान आणि तिचे कुटुंब एमआयएम नगरसेवक मतीन पटेल यांच्या घरात सुरक्षितरीत्या राहत होते.
केवळ आश्रयच नव्हे, तर निदा खानला तपासापासून वाचवण्यासाठी मतीन पटेल यांनी विविध स्तरांवर मदत केल्याचा ठपका पोलिसांनी ठेवला आहे. या गंभीर गुन्ह्यात सहभाग आढळल्याने पोलिसांनी पटेल यांना या प्रकरणात सहआरोपी केले आहे. मतीन पटेल यांचे हे घर अनधिकृत असल्याचे महापालिकेच्या निदर्शनास आले होते. त्यानुसार, आज पहाटे ६ वाजता महापालिकेच्या पथकाने पोलीस बंदोबस्तात या अनधिकृत बांधकामावर कारवाई करत ते जमीनदोस्त केले.
नगरसेवकाच्या अनधिकृत मालमत्तेवर कारवाई होत असताना एक वेगळेच चित्र पाहायला मिळाले. सहसा अशा कारवायांना विरोध होतो, मात्र येथे स्थानिक नागरिकांनी महापालिकेच्या कारवाईचे स्वागत केले. कारवाईसाठी आलेल्या पथकावर आणि यंत्रणेवर नागरिकांनी फुलांची उधळण केली. इतकेच नाही, तर उपस्थित असलेल्या उपायुक्तांचा सत्कार करण्याचाही प्रयत्न काही उत्साही नागरिकांनी केला. “गुन्हेगारी प्रवृत्तीला खतपाणी घालणाऱ्यांवर अशीच कठोर कारवाई व्हावी,” अशी भावना यावेळी नागरिकांनी व्यक्त केली.
प्रशासनाने मतीन पटेल यांच्यावर केवळ घरापुरतीच कारवाई मर्यादित ठेवली नाही. त्यांच्या नारेगाव परिसरातील कार्यालय आणि इतर मालमत्तांनाही महापालिकेने नोटिसा बजावल्या आहेत. या नोटिसांना येत्या तीन दिवसांत समाधानकारक उत्तर न मिळाल्यास, त्या मालमत्तांवरही बुलडोझर चालवण्याचा इशारा प्रशासनाने दिला आहे. नाशिक पोलिसांनी आतापर्यंत या प्रकरणात एकूण ८ जणांना बेड्या ठोकल्या आहेत. निदा खानच्या अटकेनंतर या रॅकेटचे धागेदोरे कोठपर्यंत पसरले आहेत आणि यात आणखी कोणत्या बड्या नावांचा समावेश आहे, याचा तपास आता पोलीस युद्धपातळीवर करत आहेत.
