नाशिक । प्रतिनिधी Nasik
नाशिकरोड, देवळाली व भगूर परिसरातील जडणघडणीत सामान्य नागरिकांपासून अनेक सामाजिक, राजकीय, सांस्कृतिक व्यक्ती, संस्थांनी योगदान दिले आहे. विविध क्षेत्रात उल्लेखनीय कामगिरी करणार्या अशा व्यक्तींच्या कार्याला सलाम करण्यासाठी आणि त्यांना प्रोत्साहित करण्यासाठी ‘देशदूत’ आयोजित व दीपक बिल्डर्स अॅण्ड डेव्हलपर्स प्रायोजित ‘नाशिकरोड दर्पण पुरस्कार 2023’ हा सोहळा आज (दि. 29) नाशिक- पुणे रोड येथील हॉटेल नासिक्लब या ठिकाणी पार पडणार आहे.
यावेळी मान्यवर पाहुण्यांच्या हस्ते या परिसरातील विविध 17 व्यक्तींना पुरस्कार देऊन सन्मानित केले जाणार आहे. या गौरव सोहळ्यास प्रसिद्ध सिनेअभिनेत्री उर्मिला कानेटकर यांच्यासह नाशिकमधील प्रथितयश दीपक बिल्डर्स अॅण्ड डेव्हलपर्सचे संचालक दीपक चंदे उपस्थित राहणार आहेत. सोहळ्यासाठी डॉ. गुजर सुभाष हायस्कूल यांचे विशेष सहकार्य लाभले आहे.
‘देशदूत’च्या स्थापनेला गेल्या पन्नास वर्षांची उत्तुंग परंपरा असून, ‘मनामनातील पानापानांत’ या संकल्पनेनुसार वृत्तपत्राच्या माध्यमातून सामाजिक बांधिलकी जोपासली आहे. पुरस्कार सोहळ्यानिमित्त जनमाणसाशी संवाद साधण्यासाठी, प्रत्येक पिढीसोबत असलेले नाते जपण्यासाठी, हॉटेल नासिक्लब, नंदिनी पुलाजवळ, नाशिक-पुणे रोड येथे उद्या (दि.29) सायंकाळी 4 ते 6 या वेळेत पुरस्कार समारंभ पार पडणार आहे.
आपल्या समाजकार्यातून वैशिष्ट्यपूर्ण स्थान निर्माण करणार्या व्यक्तिमत्त्वांचे कर्तृत्व जगासमोर यावे या हेतूने आयोजित ‘नाशिकरोड दर्पण पुरस्कार 2023’ या सोहळ्यास नागरिकांनी मोठ्या संख्येने उपस्थित राहण्याचे आवाहन ‘देशदूत’ परिवाराच्या वतीने करण्यात आले आहे.
