दिल्ली । Delhi
प्रसिद्ध गायिका नेहा सिंग राठोड हिच्याविरुद्ध लखनऊच्या हजरतगंज पोलीस ठाण्यात देशद्रोहाचा गुन्हा दाखल करण्यात आला आहे. भारतीय न्याय संहिता (बीएनएस) २०२३ अंतर्गत तिच्यावर गंभीर आरोप लावण्यात आले असून अनेक कलमांखाली एफआयआर नोंदवण्यात आला आहे.
ही कारवाई अलीकडील काश्मिरमधील पहलगाम येथे झालेल्या दहशतवादी हल्ल्यानंतर नेहा सिंग राठोड हिनं सोशल मीडियावर व्यक्त केलेल्या प्रतिक्रिया संदर्भात करण्यात आली आहे. २३ एप्रिल रोजी नेहाने तिच्या एक्स (माजी ट्विटर) खात्यावर एक पोस्ट शेअर केली होती. या पोस्टमध्ये तिनं केंद्रातील नरेंद्र मोदी सरकारवर जात आणि धर्माच्या आधारावर राजकारण केल्याचा आरोप केला होता.
नेहा सिंग राठोडच्या पोस्टमध्ये असेही म्हटले होते की, “पुलवामा हल्ल्याच्या वेळी जसे भाजपाने मते मिळवण्यासाठी देशातील वातावरण तापवले होते, तसेच पुन्हा घडवले जाईल.” या वक्तव्यामुळे वाद निर्माण झाला आहे.
https://x.com/nehafolksinger/status/1916378387431756034
पोलीस तक्रारीनुसार, नेहाची पोस्ट जातीपातीवर आधारित असून त्यामुळे समाजात द्वेष पसरू शकतो आणि देशविरोधी भावना निर्माण होण्याचा धोका आहे. त्यामुळे तिच्या विरोधात देशद्रोहाचा गुन्हा दाखल करण्यात आला आहे. पोलीस सूत्रांनी सांगितले की, नेहाच्या पोस्टमुळे सामाजिक सलोखा बिघडू शकतो अशी भीती व्यक्त करण्यात आली आहे. तिच्यावर बीएनएस २०२३ च्या विविध कलमांखाली कारवाई करण्यात आली असून सखोल चौकशी सुरू आहे.
गायिका नेहा सिंग राठोड ही बिहार आणि पूर्व उत्तर प्रदेशमध्ये लोकगीत गायनासाठी प्रसिद्ध आहे. तिच्या गाण्यांमध्ये सामाजिक आणि राजकीय विषयांवर थेट टीका करण्यात येते, त्यामुळे ती अनेकदा वादग्रस्त ठरली आहे. हा प्रकार घडल्यामुळे सोशल मीडियावरही दोन गट पडले आहेत. काहींनी नेहाच्या अभिव्यक्ती स्वातंत्र्याचे समर्थन केले आहे, तर काहींनी तिच्या वक्तव्यांवर टीका करत कडक कारवाईची मागणी केली आहे. लखनऊ पोलिसांनी सांगितले की, प्रकरण गांभीर्याने घेतले गेले असून कायद्याच्या चौकटीत पुढील कार्यवाही केली जाईल.
