मुंबई | Mumbai
राज्यात गेल्या काही दिवसांपासून ठाकरे गटाचे खासदार फुटणार असल्यामुळे ‘ऑपरेशन टायगर’ रंगणार असल्याची जोरदार चर्चा सुरु होती. अखेर हे ‘ऑपरेशन टायगर’ यशस्वी झाल्याचे दिसत असून, उपमुख्यमंत्री एकनाथ शिंदे यांना ठाकरे गटाचे सहा खासदार फोडण्यात यश आल्याचे पाहायला मिळत आहे. अशातच आता यातील काही खासदारांचा एका पंचतारांकित हॉटेलमधील फोटो समोर आला आहे.
या फोटोत हिंगोलीचे खासदार नागेश पाटील आष्टीकर, यवतमाळचे खासदार संजय देशमुख आणि ईशान्य मुंबईचे खासदार संजय दिना पाटील (Sanjay Dina Patil) दिसत आहेत. तसेच या खासदारांसोबत शिवसेनेचे (शिंदे गट) राष्ट्रीय समन्वयक अभिषेक वर्मा हे देखील दिसून येत आहे. हा फोटो वर्मा यांच्या २२ फेब्रुवारीच्या वाढदिवसाच्या पार्टीतील असल्याचे बोलले जात आहे. शिंदे गटाचे खासदार श्रीकांत शिंदे आणि अभिषेक वर्मा यांच्याच अचूक रणनीतीमुळे ‘ऑपरेशन टायगर’ यशस्वी झाल्याची चर्चा रंगली आहे.
दरम्यान, गेल्या काही महिन्यांपासून या ऑपरेशनची रणनीती आखली जात होती आणि त्यासाठी गुप्त भेटीगाठीही सुरू होत्या. अखेर सोमवारी ठाकरे गटाचे ६ खासदार फुटल्याचे चित्र स्पष्ट झाले होते. तसेच हा फोटो नेमका कुठला आहे, याबाबत अद्याप कोणतीही अधिकृत पुष्टी झालेली नाही. मात्र, या एका फोटोने महाराष्ट्राच्या राजकीय वर्तुळात मात्र जोरदार खळबळ उडवून दिली आहे.
