मुंबई । Mumbai
राज्याच्या पर्यावरण मंत्री आणि भाजप नेत्या पंकजा मुंडे यांच्या लातूर दौऱ्यादरम्यान एक मोठी घडामोड समोर आली आहे. छत्रपती संभाजीनगर येथून लातूरकडे उड्डाण करण्यापूर्वीच पंकजा मुंडे यांच्या हेलिकॉप्टरमध्ये तांत्रिक बिघाड झाल्याचे निष्पन्न झाले. सुदैवाने, उड्डाणापूर्वीच वैमानिकाच्या ही बाब लक्षात आल्याने एक मोठा अनर्थ टळला आहे.
पंकजा मुंडे या सध्या आगामी जिल्हा परिषद निवडणुकीच्या प्रचारासाठी मराठवाड्याचा झंझावाती दौरा करत आहेत. आज मंगळवारी, ३ फेब्रुवारी २०२६ रोजी त्या लातूर जिल्ह्यात विविध प्रचार सभांसाठी जाणार होत्या. छत्रपती संभाजीनगर विमानतळावरून हेलिकॉप्टरने झेप घेण्याच्या तयारीत असतानाच तांत्रिक त्रुटी आढळली. खबरदारीचा उपाय म्हणून उड्डाण तात्काळ रद्द करण्यात आले आणि तांत्रिक पथकाकडून हेलिकॉप्टरची कसून तपासणी सुरू करण्यात आली. या तांत्रिक अडथळ्यामुळे पंकजा मुंडे यांच्या लातूरमधील नियोजित सभांच्या वेळेत बदल करण्यात आला आहे. लातूरमध्ये त्यांच्या स्वागतासाठी आणि सभेसाठी कार्यकर्त्यांची मोठी गर्दी जमली होती. बिघाडाची बातमी समजताच कार्यकर्त्यांमध्ये काही काळ चिंतेचे वातावरण निर्माण झाले होते. मात्र, पंकजा मुंडे या सुरक्षित असून त्यांनी कार्यकर्त्यांना संयम राखण्याचे आवाहन केले आहे.
राजकीय रणधुमाळीत वेळेचे महत्त्व ओळखून पंकजा मुंडे यांनी आपला दौरा रद्द न करण्याचा निर्णय घेतला आहे. वेळेची बचत करण्यासाठी आणि नियोजित सभा पूर्ण करण्यासाठी तातडीने मुंबईहून दुसऱ्या हेलिकॉप्टरची व्यवस्था करण्यात आली आहे. पंकजा मुंडे आता या पर्यायी हेलिकॉप्टरने लातूरकडे रवाना होतील आणि तेथील सर्व जाहीर सभांना उपस्थित राहतील, अशी माहिती त्यांच्या कार्यालयाकडून देण्यात आली आहे. नुकत्याच झालेल्या राजकीय घडामोडींच्या पार्श्वभूमीवर व्हीआयपी सुरक्षेचा प्रश्न ऐरणीवर असतानाच, पंकजा मुंडेंच्या हेलिकॉप्टरमध्ये झालेला हा बिघाड चर्चेचा विषय ठरला आहे. तथापि, तातडीने घेतलेल्या निर्णयामुळे मोठा धोका टळल्याने समर्थकांनी सुटकेचा निश्वास टाकला आहे.
