नवी दिल्ली । New Delhi
पंतप्रधान नरेंद्र मोदी आज (रविवारी0 सायंकाळी ५ वाजता देशवासीयांशी संवाद साधणार आहेत. या संबोधनात ते अनेक महत्त्वाच्या राष्ट्रीय आणि आंतरराष्ट्रीय मुद्द्यांवर भाष्य करण्याची शक्यता आहे. त्यांचे हे संबोधन विविध क्षेत्रांसाठी महत्त्वाचे मानले जात आहे.
पंतप्रधान मोदींच्या आजच्या भाषणात अनेक प्रमुख मुद्द्यांवर लक्ष केंद्रित केले जाण्याची शक्यता आहे. यामध्ये जीएसटी दरांमधील कपात, अमेरिका-चीन यांच्यातील टॅरिफ वॉर आणि त्याचा भारतावर होणारा परिणाम, अमेरिकेने एच-1बी व्हिसासाठी लागू केलेले नवीन नियम आणि त्याचे भारतीय व्यावसायिकांवरील परिणाम यांसारख्या आंतरराष्ट्रीय विषयांचा समावेश असू शकतो. याव्यतिरिक्त, सध्या ताणले गेलेले भारत-पाकिस्तान संबंध आणि त्यावर भारताची भूमिका काय असेल, याबद्दलही ते बोलतील अशी शक्यता वर्तवली जात आहे.
सध्या उत्तर भारतात पावसाने थैमान घातले असून अनेक ठिकाणी पूरस्थिती निर्माण झाली आहे. या पार्श्वभूमीवर, पूरग्रस्तांसाठी पंतप्रधान मोदी काही आर्थिक मदत किंवा विशेष पॅकेजची घोषणा करतील अशी अपेक्षा व्यक्त केली जात आहे. याशिवाय, आगामी बिहार विधानसभा निवडणुका लक्षात घेता, ते काही महत्त्वाच्या घोषणा करतील का, याकडेही राजकीय विश्लेषकांचे लक्ष लागले आहे.
पंतप्रधान मोदींचे संबोधन नेहमीच महत्त्वाच्या घोषणांसाठी ओळखले जाते. आजच्या भाषणात ते नेमकी कोणती मोठी घोषणा करणार, याबद्दल देशभरात उत्सुकता आहे. त्यांचे हे भाषण राष्ट्रीय अर्थव्यवस्थेपासून ते आंतरराष्ट्रीय धोरणांपर्यंत अनेक महत्त्वाच्या बाबींना दिशा देणारे ठरू शकते. त्यामुळे, आज सायंकाळी ५ वाजता देशाला ते काय संदेश देतात, याकडे सर्वांच्या नजरा लागल्या आहेत.
