नाशिक | प्रतिनिधी
ग्रामीण भागातील जनतेस प्रभावी, सहज साध्य व गुणवत्तापूर्ण सेवा देण्यासाठी राज्यात राष्ट्रीय ग्रामीण आरोग्य अभियान राबवले जाते. या अभियांनाअंतर्गत आरोग्यविषयक योजनांची प्रभावी अंमलबजावणी करून सामान्य नागरिकांना उत्तम आरोग्य सुविधा प्राप्त करून द्याव्यात, असे निर्देश केंद्रीय आयुष मंत्रालय व स्वास्थ आणि कल्याणमंत्री (स्वतंत्र प्रभार) प्रतापराव जाधव यांनी येथे केले.
मंत्री प्रतापराव जाधव यांच्या अध्यक्षतेखाली शासकीय विश्रामगृह सभागृहात राष्ट्रीय ग्रामीण आरोग्य अभियान आढावा बैठक झाली. राष्ट्रीय ग्रामीण आरोग्य अभियान मुंबई येथील अधीक्षक अभियंता देवेंद्र पवार, नाशिकचे उपअभियंता भुषण देसले, बुलढाणा येथील उप अभियंता अभिषेक जवकार आदींसह अधिकारी उपस्थित होते.
मंत्री जाधव यांनी यावेळी राष्ट्रीय आरोग्य अभियान, पीएम-आयुष्यमान भारत, आरोग्य पायाभूत सुविधा अभियान, आयुष योजना, 15 वा वित्त आयोग या योजनांअंतर्गत करण्यात आलेली कामे, प्रस्तावित कामे व प्रलंबित असलेली कामे यांचा आढावा घेतला. राष्ट्रीय ग्रामीण आरोग्य अभियानाअंतर्गत कार्यक्रम अंमलबजावणी योजनेत मंजूर कामांची वर्षनिहाय प्राधान्यक्रमानुसार यादी सादर करण्याच्या सूचना जाधव यांनी अधिकार्यांना दिल्या.
प्राथमिक आरोग्य केंद्रांची बांधकाम करताना काम गुणवत्तापूर्वक व उत्तम दर्जाची होतील याकडे प्रामुख्याने भर द्यावा. 15 वा वित्त आयोग अंतर्गत आरोग्य विषयक विविध चाचण्या करण्यासाठी तयार करण्यात आलेल्या प्रयोगशाळा या पूर्ण क्षमतेने सुरू कराव्यात. तसेच राज्यात ज्या ठिकाणी आरोग्य विषयक सेवा देणारी दवाखाने व प्रयोगशाळा इमारतींची कामे सुरू आहेत, त्यांची अंदाजपत्रकासह नमूद केलेल्या बाबींसह तपासणी करण्यात येणार असल्याचेही मंत्री जाधव यांनी सांगितले.
