पुणे | प्रतिनिधी | Pune
येथील विश्रांतवाडी परिसरात एका ४७ वर्षीय डॉक्टरला प्रेमाच्या जाळ्यात ओढून त्यांच्याकडून तब्बल १४ लाख ३० हजार रुपयांची खंडणी (Extortion) उकळल्याचा गंभीर प्रकार उघडकीस आला आहे. एवढ्यावरच न थांबता, संबंधित महिलेने डॉक्टरांच्या (Doctor) रुग्णालयातील अत्यंत महत्त्वाच्या कागदपत्रांची नोंद असणारी वही चोरून नेली व ती परत करण्यासाठी आणखी १० लाख रुपयांची खंडणी मागितली आहे.
या सततच्या त्रासाला आणि ब्लॅकमेलिंगला कंटाळून डॉक्टरांनी अखेर पोलिसांत (Police) धाव घेतली असून, विश्रांतवाडी पोलीस ठाण्यात धानोरी येथील ३२ वर्षीय महिलेविरुद्ध गुन्हा दाखल करण्यात आला आहे. पोलीस सूत्रांनी दिलेल्या माहितीनुसार, पीडित ४७ वर्षीय डॉक्टरांचा धानोरी येथील भैरवनगर परिसरात स्वतःचा दवाखाना आहे.काही काळापूर्वी आरोपी महिला रोहिणी सुकुमार खेमाणे (वय ३२, रा. धानोरी,विश्रांतवाडी) हिची डॉक्टरांशी ओळख झाली होती.
या ओळखीचा फायदा घेत महिलेने डॉक्टरांना प्रेमाच्या जाळ्यात ओढले आणि त्यानंतर विविध कारणांचे निमित्त साधून त्यांच्याकडे वेळोवेळी पैशांची मागणी करण्यास सुरुवात केली. डॉक्टरांनी पैसे देण्यास नकार दिला किंवा टाळाटाळ केली, तर त्यांच्याविरुद्ध पोलिसांत तक्रार देऊन त्यांना तुरुंगात पाठवण्याची थेट धमकी ही महिला देत असे. या धमक्यांमुळे आणि सामाजिक बदनामीच्या भीतीपोटी डॉक्टरांनी गेल्या एका महिन्याच्या कालावधीत तिला टप्प्याटप्प्याने तब्बल १४ लाख ३० हजार रुपये दिले.
मात्र, एवढी मोठी रक्कम मिळाल्यानंतरही आरोपी महिलेची हाव संपली नाही. तिने डॉक्टरांच्या दवाखान्यातून रुग्णांच्या नोंदी व उपचारांशी संबंधित कागदपत्रे असलेली महत्त्वाची वही चोरून नेली. ही वही स्वतःच्या ताब्यात ठेवून, ती परत हवी असल्यास आणखी १० लाख रुपयांची रोकड द्यावी लागेल, अशी नवी मागणी तिने डॉक्टरांकडे लावून धरली. महिलेच्या या ब्लॅकमेलिंगमुळे पूर्णपणे त्रस्त झालेल्या डॉक्टरांनी अखेर विश्रांतवाडी पोलीस ठाणे (Vishrantwadi Police Station) गाठून फिर्याद नोंदवली, ज्यावरून पोलिसांनी रोहिणी खेमाणे हिच्याविरूद्ध गुन्हा दाखल करून पुढील तपास सुरू केला आहे.
