मुंबई | Mumbai
संजय राऊत (Sanjay Raut) राष्ट्रवादीच्या विलिनीकरणाच्या चर्चांवर तीव्र संतापले आहेत. विलिनीकरणाच्या (NCP Merger) वारंवारच्या चर्चांमुळे लोकांचे लक्ष मूळ प्रश्नांवरून हटत असल्याचे ते म्हणाले. दुष्काळ, शेतकरी आणि देशाच्या समस्यांकडे लक्ष देण्याऐवजी विलिनीकरणावर बोलणार्‍यांच्या मेंदूचा स्फोट होईल, असे राऊत कडाडले. शरद पवारांनी (Sharad Pawar) शेतकर्‍यांच्या प्रश्नांवर मोदींना पत्र लिहावे, असेही त्यांनी सुचवले.
दोन राष्ट्रवादीचं विलिनीकरण (NCP Merger) झालं काय आणि नाही झालं काय? काय फरकत पडतो? विलिनीकरणाने देश चालतो का? देशापुढे अनेक समस्या आहेत. लोकांचे प्रश्न सुटत नाहीत. दुष्काळ पडलाय. शेतकरी हवालदिल आहे. तुमचं काय विलिनीकरण, विलिनीकरण चाललंय? अरे एक दिवस चर्चा करणार्‍यांच्या मेंदूचा स्फोट होईल. या मर्जर प्रकरणाने लोकं वेडे होतील. बस झालं आता. एवढं रवंथ गायी आणि म्हशीही करत नाहीत. शरद पवारही विलिनीकरणाचा आनंद घेत आहेत, असं संजय राऊत म्हणाले.
शरद पवारांचं (Sharad Pawar) शेतकर्‍यांच्या प्रश्नावर कायम लक्ष असतं. कालच्या मोर्चाची ते दखल घेणारच. त्यांना बरं वाटलं तर ते कोल्हापुरात (Kolhapur) जाऊन भेटतील. पंतप्रधान मोदींनी (PM Narendra Modi) पवारांना फोन केला होता. देशाचे प्रश्न आपण दोघे सोडवू, असं मोदी म्हणाले होते. मला वाटतं आता, पवारांनी त्यांना ताबडतोब पत्र लिहिलं पाहिजे आधी गोकुळचा प्रश्न सोडवा म्हणून सांगितलं पाहिजे. तुमच्या लोकांनी दरोडा टाकला आहे. लोकशाहीच्या विरोधात तुमचे लोक जात आहेत. त्यामुळे तुम्ही गोकुळचा (Gokul) प्रश्न सोडवा, असं पवारांनी मोदींना म्हटलं पाहिजे, असा चिमटाही राऊत यांनी काढला.
दोन्ही शिवसेना (Shivsena) एकत्र येणार का? असा सवाल खा. राऊत यांना विचारण्यात आला. त्यावर त्यांनी नाही म्हणून सांगितलं. शिंदे गटात (Shinde) दोन गट आहे. शिंदे गटात दोन शिंदे आहेत. तुम्हीच शोधा, असं त्यांनी म्हटले आहे.
तसेच अजित पवार (Ajit Pawar Accident) यांच्या अपघातात सुनील तटकरे (Sunil Tatkare) यांचा हात असल्याचा आरोप रामदास कदम (Ramdas Kadam) यांनी केला आहे. त्यावरही राऊत यांनी प्रतिक्रिया दिली आहे. अजित पवारांच्या अपघाताच्या चौकशीबद्दल कोणी गंभीर नाही. अजितदादांचं कुटुंबही गंभीर नाही. राज्य सरकारही नाही. एक नेता आरोप करत आहे. त्यांचा मुलगा गृहराज्य मंत्री आहे. गृहराज्य मंत्र्याचा बाप बोलत आहेत. त्याची दखल घेतली पाहिजे. त्यांच्याकडे काही पुरावे असेल तर चौकशी केली पाहिजे, असं ते म्हणाले.
आईचे आणि त्यांचे जिव्हाळ्याचे संबंध
राज्याचे मंत्री प्रताप सरनाईक (Minister Pratap Sarnaik) हे संजय राऊत यांच्या घरी आले आहेत. त्यावरही त्यांनी भाष्य केलं. मी खाली आल्यावर बघितलं कोण आलं? त्यांचे आणि माझ्या आईचे वर्षानुवर्षे जिव्हाळ्याचे संबंध आहेत. सरनाईक दिवाळीला येत असतात. यातून काही राजकीय काही संकेत नाही. ते येतील बेसनचा लाडू खातील. त्यांना बेसनचा लाडू खूप आवडतो. चकली खातील. आईचा आशीर्वाद घेऊन जातील, असं राऊत म्हणाले.
