अहिल्यानगर |प्रतिनिधी| Ahilyanagar
माध्यमिक शिक्षक सोसायटीच्या निवडणुकीसाठी रविवारी नगर शहरासह 14 तालुक्याच्या ठिकाणी असणार्‍या 31 मतदान केंद्रांवर 94. 35 टक्के मतदान शांततेत झाले असल्याची माहिती निवडणूक निर्णय अधिकारी यांच्यावतीने देण्यात आली. दरम्यान सोमवारी आज सकाळी नऊ वाजल्यापासून नगरमध्ये मतमोजणी होऊन दुपारी चारपर्यंत माध्यमिक शिक्षक सोसायटीचा निकालाचा कल स्पष्ट होणार आहे. जिल्ह्यातील सुमारे दहा हजार माध्यमिक शिक्षकांच्या राजकारणाचा केंद्रबिंदू असणार्‍या माध्यमिक शिक्षक सोसायटीची पंचवार्षिक निवडणूक प्रक्रिया रविवारी सायंकाळी 5 वाजेपर्यंत शांततेत पार पडली. गेल्या पंधरा ते वीस दिवसांपासून जिल्ह्यातील माध्यमिक शिक्षकांचे राजकारण सोसायटीच्या निवडणुकीच्यानिमित्ताने ढवळून निघाले.
यंदा पहिल्यांदा ही निवडणूक अत्यंत शांततापूर्ण वातावरणात पार पडली असून शिक्षक संघटनांनी निवडणुकीच्या काळात एकमेकांवर जाहीर आरोप करण्याचे टाळत ही निवडणूक त्यांच्या वर्तुळापर्यंत सिमीत ठेवण्यात यश मिळवले. यामुळे यंदा माध्यमिक शिक्षक सोसायटीची निवडणूक मतदानापर्यंत शांततेत पार पडली आहे. दरम्यान आज (सोमवारी) सोसायटीसाठी झालेल्या मतदान मतमोजणीची प्रक्रिया पार पडणार असून यासाठी निवडणूक निर्णय अधिकारी गणेश पुरी यांचे नेतृत्वाखाली 250 कर्मचार्‍यांची नियुक्ती करण्यात आले आहेत.
यासह राखीव कर्मचारी यावेळी उपस्थित ठेवण्यात आले आहे. जिल्ह्यात 14 तालुक्यात मतदानासाठी 31 केंद्र होती. या मतदान केंद्रनिहाय मतमोजणीचे टेबल राहणार असून या टेबलवर संचालकांच्या 21 जागांसाठी झालेले मतदानची मोजणी करण्यात येणार आहे. साधारण दुपारी चारनंतर निवडणुकीचा कल हाती येणार असून सायंकाळी सहापर्यंत मतमोजणी पूर्ण होणार असल्याचे सहकार निवडणूक विभागाच्या वतीने सांगण्यात आले.
असे झाले मतदान
नगर शहर मतदान केंद्र 1-88 टक्के, मतदान केंद्र 2- 82 टक्के, मतदान केंद्र 3- 82 टक्के, नगर तालुका मतदान केंद्र क्रमांक -1 92 टक्के, मतदान केंद्र 2- 92 टक्के, मतदान केंद्र 3-85 टक्के, जामखेड 89 टक्के, पारनेर मतदान केंद्र 1-93 टक्के, मतदान केंद्र 2- 98 टक्के. श्रीगोंदा मतदान केंद्र 1- 98 टक्के, मतदान केंद्र 2- 98 टक्के. कर्जत 96 टक्के, पाथर्डी मतदान केंद्र 1-94 टक्के, मतदान केंद्र 2- 94 टक्के, मतदान केंद्र 3- 95 टक्के, शेवगाव मतदान 1 केंद्र 98 टक्के, मतदान केंद्र 2- 92 टक्के, नेवासा मतदान केंद्र 98 टक्के, नेवासा मतदान केंद्र 96 टक्के, श्रीरामपूर मतदान केंद्र 95.60 टक्के, मतदान केंद्र 2- 97 टक्के, राहुरी मतदान केंद्र 1- 98 टक्के, मतदान केंद्र 2- 96 टक्के, कोपरगाव 92 टक्के, संगमनेर मतदान केंद्र 1- 98 टक्के, मतदान केंद्र 2- 96 टक्के, मतदान केंद्र 3-96. अकोले मतदान केंद्र 1- 97 टक्के, मतदान केंद्र 2- 97 टक्के, मतदान केंद्र 3- 98 टक्के आणि राहाता 95 टक्के असे झालेले आहे.
