धर्मवीर मुक्काम पोस्ट ठाणे हा चित्रपट प्रदर्शित होऊन काही महिने उलटले. मात्र हा चित्रपट अजूनही चर्चेत आहे. या चित्रपटाची, त्यातील डायलॉगची चर्चा सोशल मीडियावर कायमच सुरु असते…
प्रसाद ओकचा धर्मवीर चित्रपट आणि त्यातील धर्मवीर आनंद दिघे यांच्या भूमिकेचे चांगलेच कौतुक झाले होते. प्रसादची भूमिका प्रचंड गाजली होती.
ठाण्याचे शिवसेना नेते आनंद दिघे यांच्यावर आधारित या चित्रपटाची निर्मिती मंगेश देसाई यांनी केली होती. हा चित्रपट प्रदर्शित झाला तेव्हाच याचा दुसरा भाग येणार अशी घोषणा केली गेली होती. मात्र आता या दुसऱ्या भागाची तयारी सुरु झाल्याचे संकेत मिळाले आहेत.
या चित्रपटाचे सर्वेसर्वा लेखक, दिगदर्शक आणि अभिनेते प्रवीण तरडे यांचा आज वाढदिवस आहे. त्यांच्या वाढदिवसानिमित्त अभिनेता प्रसाद ओकने खास पोस्ट शेअर केली आहे.
या पोस्टमध्ये त्याने धर्मवीरच्या शुटिंगदरम्यानचा या दोघांचा एक फोटो शेअर करत लिहिले आहे की, प्रिय प्रविण… वाढदिवसाच्या अनंत कोटी शुभेच्छा…!!! माझ्यामुळे तुझ्या चेहऱ्यावर आलेलं हे प्रसन्न हास्य कायम ठेवण्याचा प्रयत्न मी #धर्मवीर च्या पुढच्या भागातही करेन अशी खात्री देतो. तुझ्या सर्व मनोकामना पूर्ण होवोत आणि तुझ्या सर्व कलाकृतींना भरघोस यश मिळो हीच ईश्वरचरणी प्रार्थना…!!!
प्रसादने शेअर केलेल्या या पोस्टमुळे चाहत्यांमध्ये उत्सुकता वाढली आहे. आता ‘धर्मवीर’ चा पुढचा भाग नक्की येणार यावर शिक्कामोर्तब झाले आहे. हा चित्रपट कधी प्रदर्शित होईल याविषयी मात्र अजून काही माहिती समोर आलेली नाही.
