श्रीनगर। Srinagar
जम्मू-काश्मीरची राजधानी श्रीनगरमध्ये आज एक मोठी दुर्घटना घडली आहे. केंद्रीय राखीव पोलीस दलाचे (CRPF) एक बुलेटप्रूफ वाहन अनियंत्रित होऊन थेट कालव्यात कोसळल्याने खळबळ उडाली आहे. या भीषण अपघातात वाहनातील ९ जवान जखमी झाले असून त्यांच्यावर सध्या स्थानिक रुग्णालयात उपचार सुरू आहेत.
मिळालेल्या माहितीनुसार, हा अपघात श्रीनगरमधील अहमदनगर रोडवर झाला. सीआरपीएफचे हे बुलेटप्रूफ वाहन आपल्या नियमित मार्गावरून जात असताना चालकाचा ताबा सुटल्याने ते रस्त्याशेजारी असलेल्या खोल कालव्यात जाऊन पडले. वाहनाचा वेग आणि वजन जास्त असल्याने ते थेट पाण्यात उलटले. अपघाताच्या वेळी या वाहनामध्ये एकूण ९ जवान तैनात होते. या घटनेमुळे परिसरात एकच धावपळ उडाली.
अपघाताची माहिती मिळताच स्थानिक पोलीस आणि जवळच असलेल्या सुरक्षा दलाच्या तुकड्या तातडीने घटनास्थळी रवाना झाल्या. विशेष म्हणजे, अपघात घडताच परिसरातील स्थानिक नागरिकांनीही माणुसकी दाखवत मदतीसाठी धाव घेतली. पोलीस आणि नागरिकांनी अथक प्रयत्न करून कालव्यात अडकलेल्या जवानांना वाहनातून बाहेर काढले. जखमी झालेल्या सर्व ९ जवानांना तात्काळ जवळच्या रुग्णालयात हलवण्यात आले असून, त्यांच्यावर वैद्यकीय पथकाकडून उपचार केले जात आहेत.
या दुर्घटनेचा एक व्हिडिओ सध्या सोशल मीडियावर मोठ्या प्रमाणात व्हायरल होत आहे. या व्हिडिओमध्ये सीआरपीएफचे ते जड बुलेटप्रूफ वाहन कालव्यात कोसळलेले स्पष्टपणे दिसत आहे. घटनास्थळी स्थानिक पोलीस, सैन्यदलाचे अधिकारी आणि बघ्यांची मोठी गर्दी जमली होती. हे वाहन इतक्या सुरक्षित श्रेणीतील असतानाही हा अपघात नेमका कसा झाला, याबाबत आता तर्कवितर्क लावले जात आहेत.
