दिल्ली । Delhi
जम्मू-काश्मीरमधील पहलगाम येथे नुकत्याच घडलेल्या भ्याड दहशतवादी हल्ल्यानंतर देशातील सुरक्षा यंत्रणा आणखी सतर्क झाल्या आहेत. या पार्श्वभूमीवर सुरक्षा यंत्रणांनी अटकेत असलेल्या दहशतवाद्यांची चौकशी अधिक गतीने सुरू केली आहे. यामध्ये सध्या राष्ट्रीय तपास यंत्रणेच्या (NIA) ताब्यात असलेला तहव्वुर हुसेन राणा याच्याविरोधात सुरू असलेली चौकशी महत्त्वाची ठरत आहे. विशेष म्हणजे, या चौकशीत राणाने २६/११ च्या मुंबई दहशतवादी हल्ल्याबाबत धक्कादायक खुलासे केले आहेत.
तहव्वुर राणा हा अमेरिकेत अटक झालेला आणि सध्या भारतात प्रत्यार्पण प्रक्रियेनंतर चौकशीला सामोरे जात असलेला आरोपी आहे. तो २६/११ हल्ल्याचा मास्टरमाइंड असलेल्या डेव्हिड हेडलीचा निकटवर्तीय मित्र असून, दोघांनी एकत्रितपणे विविध गुप्त योजना आखल्या होत्या. मुंबई पोलिसांच्या गुन्हे शाखेने केलेल्या चौकशीत राणाने कबूल केले की, तो पाकिस्तानी लष्कराच्या हेरगिरी नेटवर्कचा एक भाग होता आणि खलीज युद्धादरम्यान त्याला सौदी अरेबियालाही पाठवण्यात आले होते.
राणाने असेही सांगितले की, लष्कर-ए-तैयबा ही केवळ एक दहशतवादी संघटना नव्हे, तर ती एक विस्तृत गुप्तचर यंत्रणा म्हणूनही कार्य करत होती. त्याच्या मते, डेव्हिड हेडलीने लष्करसाठी अनेकदा प्रशिक्षण घेतले होते आणि भारतात हल्ला करण्यापूर्वी विशिष्ट ठिकाणांची रेकी केली होती. यामध्ये मुंबईतील छत्रपती शिवाजी महाराज टर्मिनस (CSMT) स्थानकाचाही समावेश होता.
राणाच्या चौकशीतून पुढे आले की, त्याचा मुंबईत ‘इमिग्रेशन फर्म’ स्थापन करण्याचा उद्देश होता. संबंधित आर्थिक व्यवहार व्यावसायिक खर्च म्हणून दाखवण्यात आले होते, मात्र या व्यवहारांमागे दहशतवादी कटाचा भाग असल्याची कबुली त्याने दिली. विशेष म्हणजे, राणा २००८ मध्ये मुंबईत उपस्थित होता आणि हल्ल्याच्या पूर्ण कटात तो सहभागी होता, हे त्याने चौकशीत मान्य केले आहे. तसेच, २६/११ चा हल्ला केवळ लष्कर-ए-तैयबाचा नव्हता तर त्यामागे पाकिस्तानच्या गुप्तचर संस्था ISI चा थेट सहभाग होता, असा धक्कादायक दावा राणाने केला आहे. त्यामुळे भारतात या हल्ल्यामागील अधिक गूढ बाजू स्पष्ट होण्याची शक्यता आहे.
तहव्वुर राणा आणि डेव्हिड हेडली यांनी संयुक्तपणे भारतात विविध टार्गेट्सवर नजर ठेवत माहिती संकलनाचे काम केले होते. २६ नोव्हेंबर २००८ रोजी १० पाकिस्तानी दहशतवादी अरबी समुद्रमार्गे मुंबईत पोहोचले होते. त्यांनी CSMT स्टेशन, ताज आणि ओबेरॉय हॉटेल्स, तसेच नरीमन हाऊस या ज्यू धर्मीय केंद्रावर हल्ला चढवला होता. या सुमारे ६० तास चाललेल्या दहशतवादी कारवायांमध्ये १६६ निरपराध नागरिकांचा बळी गेला होता, तर ३०० हून अधिक जखमी झाले होते.
या पार्श्वभूमीवर मुंबई पोलिस आता तहव्वुर राणाला आपल्या ताब्यात घेण्यासाठी तयारी करत आहेत. त्याच्यावर लष्कर-ए-तैयबा, हरकत-उल-जिहादी इस्लामी आणि पाकिस्तान सरकारच्या गुप्त संस्थांसोबत कट रचल्याचा आरोप आहे. तहव्वुर राणाच्या कबुलीजबाबामुळे २६/११ हल्ल्याच्या तपासाला नवा आयाम मिळाला असून, या दहशतवादी हल्ल्याच्या पार्श्वभूमीवर पाकिस्तानचा थेट सहभाग असल्याचे पुन्हा एकदा स्पष्ट झाले आहे. आता पुढील चौकशीतून आणखी काही महत्त्वाचे तपशील समोर येण्याची शक्यता आहे.
