मुंबई | Mumbai
मुंबईतील लोखंडवाला येथील रिया पॅलेसमध्ये आज सकाळी नऊच्या सुमारास भीषण आग लागल्याची घटना घडली आहे. या आगीत तीन जणांचा होरपळून मृत्यू झाला असून अग्निशमन विभागाच्या माहितीनुसार लेव्हल एकची आग असून या आगीचं कारण अद्याप अस्पष्ट आहे.
या आगीमध्ये चंद्रकांत सोनी (वय ७६) कांता सोनी (वय ७१) आणि नोकर रवी (वय ३३) असे होरपळून मृत्यू झालेल्या तिघांची नावे आहेत. तसेच या आगीचा माहिती मिळताच अग्निशमन दलाच्या पाच गाडा घटनास्थळी दाखल झाल्या होत्या. त्यानंतर त्यांना तब्बल एका तासांमध्ये आगीवर नियंत्रण मिळविण्यात यश आले.
दरम्यान, सदर इमारत १४ मजली असून या इमारतीच्या दहाव्या मजल्यावर सकाळी नऊच्या सुमारास भीषण आग लागली. या आगीत जखमी झालेल्या लोकांना जवळच्या कुपर रुग्णालयात दाखल करण्यात आले होते. तसेच ओशिवरा पोलिस देखील घटनास्थळी दाखल झाले असून त्यांच्याकडून तपास सुरू आहे.
